【本報訊】周一衝擊立法會的年輕人，在政府及建制派口中是一群有組織的「專業暴徒」。但當晚首批衝入立法會的示威者坦承，那一刻其實十分驚恐不安，怕中了警方「空城計」，但出於要支援其他示威者的原因，以及對「垃圾」政府的絕望，才義無反顧承擔衝擊立法會的刑事責任。
入去嘅都好驚，第一下諗嘅係空城計，但年輕人係去到一個幾咁絕望嘅點，先決定犧牲未來。
示威者阿紅（化名）昨在《果燃台》節目「你問我答Live」中表示，她當晚純屬自發參與，攻佔立法會是因為被建制壟斷的議會一直出賣香港人，她們亦要代表三位反送中輕生者走完最後一步。有示威者撞玻璃牆是情緒高漲的鹵莽行為，她有嘗試勸止但不成功，大家商討後認為「無理由剩低佢一個戇居居扑玻璃」。她是其中一個首批衝入立法會的示威者，當時是集體的意志。
「入去嘅個個都好驚，因為水盡鵝飛，乜都無，燈又無，完全唔知發生乜嘢事」。後來有上樓探路的示威者回報安全，大家才夠膽上會議廳。她指出，警方無端撤出，「第一下諗到嘅係空城計，係咪特登放啲人入去，之後就開記招話你呢班人犯唔知乜嘢法」。雖然知道衝入立法會風險很高，但大家都是香港人，「我覺得入面嘅人需要支援，我選擇入去」。
阿紅說，踏進立法會的一刻，大家都知「分分鐘一坐就十年，但呢個政府實在太垃圾，人命死咗你唔理，200萬人上街你唔理，究竟我哋年輕人係去到一個幾咁絕望嘅點，先去決定犧牲自己未來」。
當晚留在立法會外的示威者阿橙（化名）認為，他們無資格干預或批評在前線衝擊的示威者，「不論啱定錯，佢哋係付出好多幫香港市民去爭取」。警方無阻止好明顯「係一個局，但係大家要保護好大家，就算係一個局，都要做」。他覺得衝擊後公眾輿論仍在抗爭一方，「因為我哋人格冇泯滅，我哋重係香港人，入去攞嘢飲會畀錢，正正係呢啲咁細微嘅地方，足以顯出我哋人格美好一面」。警方秋後算賬已開始，後果一定有，但希望大家將出事機會減到最低。
民主黨立法會議員鄺俊宇透露，有不少年輕人因吸入催淚煙不適，或肺部有問題，又不敢去公立醫院，他們團隊已安排20至30人向私家醫生求診，過程會保密。
■記者麥志榮