7.1遊行當日近百名示威者闖入立法會大樓，現場唔少設施都被毀壞，港府同建制派當然借勢譴責以令輿論逆轉，藍絲陣營專頁更加唔會放過示威者，連日出招狙擊，八方發現，有專頁更加話民主派會議召集人毛孟靜細仔有份衝擊，仲「有圖有真相」咁將Miss Mo細仔個樣同現場一位示威者對照，講到似層層咁。
八方就此問過毛孟靜，原來佢已經聽聞過相關消息，直指：「當堂嚇一跳，然後得啖笑」。點解嚇一跳？皆因Miss Mo話兩個仔目前都喺外國生活，細仔喺巴黎做緊科學家，最近根本都冇返嚟香港，佢睇完藍絲專頁嗰張相都大呼搞笑，好奇怪點解會用佢個仔10年前嘅相嚟做文章？笑稱阿仔家陣成面鬍鬚，根本唔係相中人嗰個樣。佢笑完都鬧建制派不斷用網上平台造謠生事，抹黑民主派同反送中運動，目的都係轉移視線，呼籲佢哋與其再搞小動作，不如叫政府盡快回應訴求喎。