已故名伶新馬師曾鄧永祥遺孀，祥嫂洪金梅前日下午5時左右離世，享年73歲，長子鄧兆尊表示與弟妹都有到醫院送母親最後一程。昨早兆榮及小艾現身，為母親辦理身後事。而兆尊則表示母親會於歌連臣角火化，因祥嫂生前怕嘈，故會用西式葬禮，透露母親病危前叮囑他「千祈唔好結婚」。
兆尊答應唔結婚
昨早10時許，祥嫂的二兒子兆榮及長女小艾步出永祥大廈，當時小艾戴太陽眼鏡遮掩倦容，但仍停步讓記者影相，問到祥嫂後事如何安排，兆榮說：「𠵱家去搞（死亡證）。」之後便偕小艾上七人車離開。
其後兆尊透過電話回覆，指今年初知道母親患病後已遍尋名醫，可惜祥嫂病情急轉直下，他說︰「呢一年我哋可以做嘅係盡量陪喺佢身邊照顧佢，一個月前佢同我講，叫我千祈唔好結婚，保持現狀就好，我即時答應佢，佢就好滿意。」兆尊更透露祥嫂的身後事：「喪禮定咗本月11日喺香港殯儀館設靈，12日出殯。阿媽臨終已經安排好後事，會喺歌連臣角火化，喪禮會採用西式，因為佢怕嘈。」
問到祥嫂的15億遺產如可分配，兆尊說︰「我從來冇問過佢身家啲嘢，亦唔知佢有冇立遺囑，至於佢有幾多錢身家，我唔知道，因為同佢分開咗咁多年，冇過問佢嘅財產。佢身家點分配，我唔關心，只係想盡快搞好佢嘅後事。」當年祥嫂因爭產與子女反目，但現在還是把財產留給子女，問兆尊會否覺得諷刺？他說：「祥嫂其實係外冷內熱，把口兇個心係冇乜嘢嘅人，當年可能係為咗爭一口氣搞成咁，我覺得阿媽有啲似林鄭月娥，有時明知做錯咗，但為咗面子，點都要堅持，唔肯認衰。」兆尊強調多年來，他對母親無怨無恨，反而做和事老調停弟妹與祥嫂的關係：「佢始終係十月懷胎生我哋出嚟，上一輩嘅事，我哋做後輩唔應該評價，而且人都唔喺度！仲有乜恩怨呢！」
遺願葬荔枝樹下
另外，祥嫂數十年閨密黃夏蕙，昨早忽然想起祥嫂生前心願，她回覆《蘋果》時說：「祥嫂生前同我提過一個遺願，佢當年冇住永祥大廈，搬咗去元朗獨立屋永祥苑獨居，有四個工人，六、七隻狗，我成日去探佢，祥嫂屋中放咗好多祥哥遺物，祥嫂話全部係同祥哥嘅回憶，佢個花園好大，種咗好多果樹，今年5月，祥嫂有次仲話將來死咗要葬喺棵荔枝樹下。佢話如果死咗葬喺度，間屋就唔會有人買，就可以永遠保留。」黃夏蕙尊重祥嫂子女安排，但她希望公開亡友心願，讓其子女作參考。
採訪︰曹家誠、鍾國仁、陳杰
攝影︰陳慧安