示威人士前晚衝入立法會大樓後，在反送中惡法輿論戰一直陷於捱打的北京、港府同建制派，即時「食住上」全面反擊，全部第一時間飛撲出來「譴責暴徒」。有民主派中人指，今次港府、建制派操作，其實是複製2016年旺角騷亂後，搶輿論陣地打港獨、本土、民主派手法，但今次整件事與旺角騷亂不同，直言因政府、建制過去幾年行徑令不少市民忍無可忍，也令市民對衝立會大樓「多咗理解同包容」，「即使市民唔接受衝立會，但唔代表會支持港府同建制派」。
建制抽水隨時抽着火水
該民主派中人指，至今他接觸不少街坊，「好多人話衝立會係唔好，但林鄭、建制派係反送中所作所為真係太X街，班後生都係被迫到咁做」。事實上今次事件與旺角騷亂不同，市民不斷上街、不斷以和理非方式提出訴求，「100萬人上街冇反應、200萬人上街又冇反應，之前又向示威者開槍，班後生忍無可忍衝入立會，正如有個老街坊話，如果佢後生30年，都去衝埋一份，因為政府同建制派完全冇當市民存在」。
其實旺角騷亂之後，不論電台節目還是社交網站上，均甚少人敢公開支持示威者，「但係今次好唔同，有市民打上電台節目撐示威者、社交網站瘋傳各種支持示威者嘅文，輿論冇好似政府或者建制派預期咁一面倒支持『譴責暴徒』，反而多咗人同情」，所以建制派想藉此抹黑示威者以及泛民，「可能隨時有反效果，抽水抽着火水」。
季陶
周一、三、五刊出