范冰冰同李晨上個星期四宣佈「分訊」，將四年情畫上句號，聲明仲話「我們不再是我們」，不過佢哋再見亦是朋友，宣佈分手後第三日，即被內地傳媒影到二人一齊去一間泰國餐廳食飯，相信係段感情咁耐，一時三刻好難割捨嘅。
不捨講拜拜
噚日有內地傳媒報道，話范冰冰同李晨喺大前日私下聚餐，李晨喺當日晏晝獨自揸車去餐廳，跟住范冰冰同助手現身，行入餐廳內嘅一間房，食飽之後佢兩個低調行出餐廳，去到架車前面，仲臨別依依揮手講拜拜，睇嚟范冰冰同李晨仲係好關心對方。
而內地造型師卜柯文噚日又喺微博，貼出一啲疑似同冰冰嘅聊天對話截圖，對話中，卜柯文直接問冰冰係咪懷孕，冰冰就話：「我已經胖到所有人都以為我懷孕了嗎？可我明明瘦了啊！這段時間還掉了幾斤！哈哈哈哈哈」不過，卜柯文明顯唔收貨繼續追問：「你確定你瘦了嗎？你看我拿過去的衣服你能不能穿下！你再減減吧，不然真的是肥冰了。」冰冰之後又自誇「肥又美麗」，又喺對話度透露目前接唔到工作。不過，日前冰冰同李玉導演參加北京朗讀會，一齊上台朗讀童謠詩集《金子美玲》，今次係冰冰宣佈分手後首次現身，有網友就質疑，佢啱啱分手就即刻參加活動，似乎係想趁分手復出。
撰文：馮仁昭