【本報訊】當電視、網上畫面全日不停播放7.1佔領立法會的畫面，不少巿民不禁問「為何要衝？」《蘋果》昨凌晨在警方清場後訪問了數名留守至最後一刻學生示威者，他們形容是以克制的暴力對政權宣洩。決定衝入立法會，他們已視死如歸：「其實過去一個月，你見得到香港人做到嘅嘢，都已經真係做晒，連外國嘅文宣都已經做埋，作為一個後生仔，我7.1有種更待何時嘅感覺，知道唔會再有任何一次機會可以召集到一班人出嚟，因為大家真係攰喇！」
「冇破壞都會話我哋係暴徒」
身心俱疲的示威學生在警察清場後，部份走到最前線的學生示威者仍然集結在一起，討論行動得失，有人形容這次是示威官逼民反，「我反而想問大家，年輕人係唔係好想流血俾人打？正正其實冇一個年輕人會想俾人打、被人噴胡椒噴霧，但係年輕人都有一個心態就係，捨我其誰？」
學生們稱，大家都不希望看到任何暴力或衝突事件發生，所以踏入7.1凌晨，一班年輕人只是不斷做各種文宣，如換黑色國旗、放氫氣球，直至傳出有很多人指摘年輕人繼續於立法會聚集，他們更被扣上是「鬼」的罪名，激發站在最前的一班年輕人情緒。
隨時面對刑責，賠上前程，值得嗎？有同學稱：「舊嗰套達唔到我哋想要嘅目的，惟有用啲新嘅方法，冇話值唔值得。從來抗爭都唔會睇犧牲啲乜，係其實我哋想要啲乜，只要嗰樣嘢你覺得值得、覺得正確、覺得正義。」有指衝擊立法會會令過去一個月的民意逆轉，製造機會給建制派口誅筆伐，「就算冇毀壞啲嘢，佢哋都會話我哋係暴徒，咁有乜分別？」
另外有學生不忿地說：「我哋想叫醒嘅係香港人，香港人未醒，香港人只係習慣咗好似買贖罪票咁，我出過嚟遊行完、登記完做選民咁就ok，但佢哋完全忽視制度上嘅所有問題，功能組別、建制派啲掌心雷，所有嘢都忽視。」
亦有學生發出絕望哀號：「我哋睇住香港崩壞，如果今日我接受暫緩，然後隔幾個月或一、兩年我哋又再上街，咁樣嘅未來我想唔想過呢？我會答你我寧願俾差人一槍射死，好過我繼續留喺度受苦！2047以後，我哋會成為當家作主嘅中年人，要我喺咁樣嘅香港生活，我唔想！」
■記者謝志輝