呢兩日睇直播，見到英雄本色般畫面：一群本已撤離嘅年輕人，趕回立法會，要抬走明志留守嘅4名戰友，嗰份勇氣令人動容！條片亦提醒我哋，要改變同顛覆世界，靠晒班後生仔。佢哋成功嘅機會，大過上一代好多好多。唔止政治，就算睇創科、香港startup ecosystem，情況亦一樣。
上星期寫，廢老投資者冇耐性，又唔願付出，創業無幾耐就話要攞返錢，抽創辦人後腿。其實就算資本多、比較識嘢嘅投資者，例如Family office、機構投資者，甚或係上市公司，另一個嚴重問題，係佢哋要佔大股！聽過要求過半股份，甚至有人要七成。當付出同回報不成正比，創辦人點解唔打工？傻的嗎？
再講，如果投資者本身有價值，幫到手，佔大股問題不大，例如你搞自駕車，孫正義話投資，畀佢佔大股，你心服口服。但如果，投資者本身已過氣，唔幫手不特止，仲做狗頭軍師，搬自己幾十年前經驗出嚟，教後生仔點做，將舊經濟嘅做法，加諸新經濟運作上高，可以話相當之不智。
上一代如果做到，早就自己做咗，又何需投資後生創業？正如傳統銀行自己做到，點解要有Virtual Bank？又何需同Fintech Startups合作？
創業本來就係一趟不斷犯錯、並從錯誤中找尋出路嘅旅程，任何人創業一定犯錯，正如任何人年輕時都會犯錯。錯不要緊，只要修正得快，成功前的犯錯，有太多例子，Lalamove就曾進軍東京失利，差兩個月破產，投資者難道此時就要割席？相反，有真見識的投資者，選擇在此時以行動支持Lalamove，助他們度過難關！當時有份參投的，包括來自台灣的AppWorks之初創投和香港的MindWorks Ventures。
錯並不致命，「不敢犯錯」才是最多Startups的死因！以團結代替指摘，投資者同創業者各有各做，不篤灰，不指摘，不割席，所有人才會收到最大回報。
尹思哲
linkedin.com/in/wanszezit