建制派喺反送中事件中俾人係咁砌，見到示威人士衝入立法會大樓，仲唔即時執到寶咁衝出嚟譴責「暴徒」兼抽泛民水咩！但未抽水前竟然先上演一幕籠裏雞作反，剛搞完撐警集會嘅何君堯當正自己係建制派大佬，當住成班建制派同記者面前狂咬謝偉俊，之後仲癲到連在場記者都鬧埋。
「Shut up」「廢柴」「契弟」
立會大樓前晚遭示威者闖入，噚日各黨派議員都返回立會大樓現場，大樓外架設臨時咪兜位，供泛民同建制派議員向傳媒發言，話說民主派議員喺咪兜位發言期間，何君堯突然發難，遠處高叫「Shut up」（閉嘴），同屬建制派嘅謝偉俊上前相勸，點知何連謝都咬埋，大聲喝謝「stand aside」（走開）、「我忍咗成日」。
何君堯之後繼續用「idiot」（蠢材）、「scumbag」（混蛋）及「廢柴」等字眼，一個人喺民主派議員旁邊鬧，仲想夾硬搶咪兜位但唔成功，於是又想率隊轉到其他位置受訪，但因傳媒已經喺咪兜位架設攝影機及咪高峯等器材，有人叫建制派等泛民講完先，點知何君堯又出言挑釁傳媒，話「我哋建制派使就班契弟？」惹來傳媒不滿，一度同佢爭執，最後在場傳媒決定，除非建制派返回咪兜位發言，否則集體杯葛。
建制派喺只有外媒採訪嘅情況下，於距離咪兜位約20米處開始發言，其後見泛民主派議員發言完畢，又拉大隊回到咪兜位輪流發言，不過何君堯扮晒大佬，拒絕跟建制大隊，繼續鬧……