梁詠琪（GiGi）、羅仲謙和電影《小Q》導演羅永昌昨日到薄扶林一間盲人學校進行探訪，他們獲安排蒙眼吃飯，體驗視障人士生活，但GiGi和謙仔食飯飲湯時，要旁邊的視障學生提點。之後有兩位學員表演唱歌時，GiGi感動到眼濕濕，她說：「頭先食飯時好開心，有小朋友教我，我碗飯喺12點鐘，紙巾喺11點鐘位，感觸嘅係，佢哋知道自己身體有殘障，但係佢哋冇放棄，呢樣係最感動我。」謙仔笑說：「其實想用手食，因為一定摸到啲餸。」
唔怕被華哥拖累
GiGi坦言希望社會有更多接納和包容，她說：「我都明白有啲人唔鍾意狗，或者驚狗，但希望可以透過呢部戲對導盲犬有多啲認知，其實佢哋透過好專業嘅訓練，佢哋對周圍嘅人唔會構成危險嘅威脅。」譚詠麟、鍾鎮濤等日前現身撐警活動而令歌迷不滿，更將多年來的珍貴唱片全數銷毀，而《小Q》的拍檔任達華早前在Ig上載一張撐警畫作，問到會否擔心影響《小Q》票房？GiGi說：「我真係唔知，我覺得每個人都有表達自己意見嘅方式，我諗都係唔好諗咁多，都唔諗得咁多。」
謙仔恨生龍鳳胎
此外，謙仔太太楊怡早前曾透露恨生小朋友，謙仔坦言：「大家都想，想生小朋友，首先兩個人都要喺香港，咁就可以早晚開工，朝早拍劇，夜晚『開工』，不過唔係勤力就得，要配合天時地利人和，希望明年啦！因為我都係屬鼠，第一胎就仔女都冇所謂，但係太太覺得生囝囝先就冇咁大壓力，因為要同長輩有交代，其實最好龍鳳胎，咁就猛料喇！」
採訪：黃曉妍
攝影：林賓尼