【反送中】
【本報訊】昨日凌晨警方逼近立法會準備清場的緊張時刻，大部份示威者決定撤退，四名「死士」執意留守，不畏被捕甚至受傷。其中一名24歲示威者說：「預咗㗎啦，唔預咗（坐）十碌八碌（年），唔預咗一身傷，做乜要走入嚟立法會？」這位已為人父的年輕爸爸表示，佔領立法會有象徵意義，他自小在香港長大，反問質疑行動者說：「你哋會唔會願意放棄咗佢（自由）？」
記者︰陳建平
準備「就義」的「死士」之一飛機（化名）接受《蘋果》訪問時親述死守原因，他由6月9日首場反送中示威至昨日7.1示威，示威者付出很多努力，「由100萬人，到200萬人，到今日（昨日）50幾萬人，民意好似回潮咗，我哋會唔會就咁由得個運動冷卻？返屋企瞓覺，好舒服就完結咗個運動呢？」他堅持佔領立法會有象徵意義，雖然「唔係好有作用，只係有一個象徵意義」。
「一早知唔夠共產黨打」
作為一子一女之父，飛機又指出，他在香港長大，其父親因文化大革命避走香港，「佢為我心口中咗一槍，有個槍印」，幾經辛苦游水赴港，爭取有尊嚴的生活，反問：「（我）係咪應該就咁樣拋棄佢？我作為一個爸爸，我係咪應該咁容易放棄咗佢？」
經過6.12一役，示威者對警方武力不會陌生，亦明白留守的風險，飛機說得坦然：「預咗㗎啦，唔預咗（坐監）十碌八碌（年），唔預咗一身傷，做乜要走入嚟立法會？入咗嚟點解要出去呢？會唔會參考吓太陽花革命呢？」
留守只有四人，飛機透露他們的最後部署，就是死守至最後，「好少人，只可以盡量死守，鎖死五道門，但我哋知道如果下面形勢唔太樂觀，亦鎖唔到幾耐」，但他不甘心就此離開，「我哋一早知道共產黨……我哋冇可能夠佢打，解放軍好惡，我哋一定唔夠佢打，唔夠打點解要出嚟呢？」
他又稱，不會怪責其他離開的示威者，因為其他人亦有不同看法，「兄弟爬山，各有各做，我哋要靠樓下嘅示威者保護我哋」。
「你哋會唔會放棄自由？」
被問及想對香港人說甚麼，他嘆了一口氣，說起其父曾經告訴他，如果上輩子非殺人放火、姦淫擄掠，今生不會當香港人，「但係我從細都喺呢個地方長大，我好鍾意呢種有自由、尊嚴嘅生活，你哋會唔會願意放棄咗佢？」
他又祝願一對子女好運，「老竇畀唔到呢乜嘢你，你哋睇吓老竇今日做到啲咩，睇吓對你哋嘅人生有乜嘢參考，對與錯我唔敢講，你哋成熟咗，有個人思想，你哋自己諗吓！」