老友記阿碌引述Warren Bennis之言：Leaders are people who do the right things; managers are people who do things right。這位Bennis先生（中譯：華倫班尼斯）係MIT博士，著名組織理論、領導理論大師。佢呢句金句：「領袖做對的事情，經理把事情做對了」，應用於今日香港嘅情況，非常對辦。
以急忙、心急推動修訂《逃犯條例》嚟講，特首林鄭月娥是否do the right things？大家都知道唔係啦，今時今日嘅香港，一個特區政府領導，有大把right things可做。譬如全港市民，無論幾時做民意調查，都係最關注三件事：（一）房屋；（二）醫療；（三）教育，前兩件尤其重要。一位真正有視野、有眼光、有意為人民服務嘅政治領袖，當然係以解決房屋及醫療問題為首要。解決呢兩件事，將香港人居住環境及醫療服務提升到起碼新加坡嘅水準，殊不容易，需要消耗大量政治資本與個人能量，係艱難嘅，但是要do the right things，真正領袖點可以浪費精力於其他未見其利，先見其害的損民法例修訂？最近的事情已充份證明林鄭不是一位領袖，將所有政治資本耗盡，惹來民怨民憤，還是推行不了她的《逃犯條例》。過往不少人話佢好打得，話佢熟悉官場運作，做事盡力。在《逃犯條例》事件，卒之露出原形，林鄭最多只是一位經理人，以往在不同上司底下，把事件做對了，但輪到她當家作主，她就分不清甚麼是對的事情，兼且也不能把事情做對了，連番犯下錯誤：不諮詢、不撤回，連認錯道歉也是表面工夫，毫不真誠。
6月15日《大公報》社論明白說明：特首會宣佈撤回《逃犯條例》修訂，怎知道6月15日下午林鄭只肯說「暫緩」，究竟是《大公報》寫錯還是創作？幾日前左丁山碰見一位資深編輯，問他《大公報》社論為何出錯。他苦笑：「文大嘅社論代表中聯辦認可嘅意見，一字一句都要斟酌，定稿後要上頭審閱，邊度會亂噏吖！編輯要負責㗎！」飲咗幾啖茶，佢慢慢講：「聽聞韓正在深圳見林鄭，係有提過撤回嘅！」哦！將在外，君令有所不受？咁大膽！後來民建聯李慧琼（一個聽黨話跟黨走的自己人）都提議政府「撤回」，如無事先收風，點敢亂噏呀！真可怕，女特首不能做對的事情，也不能把事情做對了！