【回歸/戀殖】
1997年6月28日是星期六。香港最後一個英女皇壽辰假期。為配合主權移交，這年的6月28日及30日都是紅日，市民可連放五天假。很貼心。
港英重收買人心，港共重分化社會。年年7.1，都是上街日。
可是1953年6月2日至4日，港九新界張燈結綵舞龍舞獅；在制水的年代，這三天食水全日供應——因為「事頭婆」加冕。港產加冕紀念品還進軍英國老家，至今硬淨如新。
Made in Hong Kong，真正的土炮。
「呢個顦口杯，啲人成日嗌佢銻杯，其實佢係鋁杯。英女皇加冕，為咗普天同慶，每間學校嘅小朋友都有一隻鋁杯，男女嘅款都唔同。男仔有個徽章，女仔就多隻匙羹。咁街童又點呢？政府好醒嘅，港九新界都有特定嘅時間免費派。」在香港，研究英女皇伊利沙伯二世的人不少，三十出頭的周浩正（Lawrence）是其中一個，也是「香港收藏家協會」成員之一。
1952年2月6日，英王喬治六世駕崩，長女伊利沙伯公主即日宣佈登基繼位，成為英女皇伊利沙伯二世。翌年6月2日，27歲的伊利沙伯二世在倫敦西敏寺接受加冕。
由6月2日至4日，香港舉行加冕巡遊慶典，政府還成立「華人慶祝英女皇加冕會景巡遊籌備委員會」，港商亦爭相生產加冕紀念品，港府遂設立「香港慶祝女皇加冕紀念品小組委員會」，負責品質檢定及向英國本土和屬地推銷港製紀念品。當時港英政府極重視加冕紀念品，還刊憲頒佈，未經批核，不得擅自進出口加冕紀念品，違者罰款二千元或入獄六個月，生效日期至1953年7月1日。
女皇加冕 嚴控港製紀念品
Lawrence說：「當年啲人做假，會俾人報寸！做紀念品要攞license，嗰時政府好擔心，因為是英女皇加冕，關乎皇室，擔心濫竽充數會整衰英女皇，佢哋好驚。」
當年第一批運往英國銷售的加冕紀念品，包括繡花枕、枱布、搪瓷、象牙製品、袖口鈕，就連電筒、熱水瓶和塑膠製品都有。其中一款金漆盒，上有兒童九人，玩物五件，表現「九五之尊」之意，外國人愛不釋手。
芸芸Made in Hong Kong加冕紀念品當中，最為人港人熟悉，應是「唯一冷熱水壺廠」——駱駝牌出品的紀念水壺，至今仲用得。Lawrence說：「當時香港同外國公司都會申請生產呢款紀念品，扭開內膽，有駱駝牌標誌，真正嘅Q嘜。全部膽由老師傅吹，而家做唔返。加冕期間仲有九折，畀學校、醫院同民眾訂。」他還收藏了一款馬車玩具，脆膠製，主要售往英國 ，「啲脆膠真係好脆，但係馬車同馬都冇斷腳，車底印住Made in Hong Kong，真係好難得。香港嘢一啲都唔衰！」
「再得意啲好似呢隻碟咁樣，係香港一間叫做昌記嘅瓷器廠製作。呢set碟用嚟做佈置，分大中細、藍白綠三隻色，最大size嘅已經失傳。全部人手上釉，有兩條龍，中文字，有事頭婆個樣，加個皇冠、如意吉祥嘅邊，體現中西文化交流特色。」Lawrence笑言見過一隻同款瓷碟，「甩咗」半個事頭婆，原來當年物資短缺，擁有者忍痛以這裝飾用瓷碟上菜，「舔到隻碟冇晒顏色。」他笑說。
採訪：吳佩思
攝影：劉永發