【爆相爆片】甄子丹身手了得有「宇宙最強」之稱，同老婆汪詩詩所生嘅囝囝甄濟嘉（James）都完全遺傳咗佢啲運動細胞。讀者毛小姐日前透過本報「爆相爆片」，分享咗汪詩詩日前帶11歲囝囝James去灣仔修頓運動場參加跆拳道考試情況。
毛小姐日前接受電話訪問，佢話當日下午3點多，見到汪詩詩同James喺場館，穿上整齊跆拳道服裝嘅James準備考試，毛小姐話：「嗰日大概有過百名小朋友考試，連埋家長有成二百幾人。」
踢木板失手
毛小姐指汪詩詩等咗大約一個鐘，終於到囝囝同其他小朋友一齊集體操練，James由踢腳到出拳嘅姿勢都唔錯，出拳有力，踢腳又高又直，甚有乃父之風，James表現信心十足。不過，James踢木板時就有啲失準，毛小姐話：「James第一次踢木板時失手，踢唔斷，佢媽咪睇到好緊張，如果再一次失手，考試就會唔合格，好彩第二次就成功，汪詩詩立即放鬆晒。」
考完試後，James同媽咪一齊坐喺觀眾席休息，收拾一下就離開。呢排子丹為新戲《怒火》趕戲，未有到場為囝囝打氣。
撰文：馮仁昭