【創業故事】如果陽光海灘成為工作日常，返工是否更輕鬆﹖何柏奇自小愛出海，19歲未考車牌先考船牌，正職原是平面設計師，逢星期六、日兼職開快艇。十年前買入第一艘快艇做船主，發現租船市場大有可為，近年再添置兩艘快艇，去年更與設計師同事合資150萬元買入遊艇，全情投入租船生意，預計3年回本。
記者：蔡亮
曬得一身黝黑的何柏奇，11歲加入海童軍開始玩船，學生時代贏過不少帆船公開賽獎項，但從未想過以開船作為職業，反而投身平面設計行業。「2008年，有做開快艇嘅朋友叫我逢假期幫手揸船，載人出海滑水，當時日薪只有500蚊，由5月做到11月，一年最多做40日，收入唔多但幾好玩，就當賺下外快。」
一年後，朋友想賣船，何柏奇索性接手，以4.8萬元買入快艇。「如果自己係船主好做好多，每日生意額有2,600、2,700元左右，扣除代理佣金、油費，每日收入約2,000元，即一年有7、8萬元額外收入。」
兼職揸船賺外快
何柏奇一直抱着好玩的心態兼職開船，但打理快艇費時，正職又絕不輕鬆，加上開船的收入多年來沒有上漲，曾經令他想棄船。「直至2017年遇上新衝擊，當時有帆船會請我逢假日開接駁艇，我丟低自己架快艇去做。雖然呢份兼職我只係做咗個幾月，但期間識咗另一個船伕，我將原有嘅快艇賣一半畀佢，我再買入另一艘船自己揸。」
由一艘變兩艘，原意是想找人分擔工作，想不到提升了市場競爭力，生意突然急升。「原來有兩隻船會多好多人搵你，因為一隻船跟一間代理，俾人book咗就冇，但多一隻就好多人問。」機會在眼前，但缺乏的是人手，何柏奇與設計師同事林映熹向來投契，於是嘗試邀請他加入。
身形瘦削、皮膚白皙的林映熹，本身並不熟悉海上活動，貿貿然學揸船，他笑稱全因錢作怪，「我將近30歲，計劃成家立室，但平面設計工作收入唔多，難以負擔將來嘅經濟開支，因此想試下做兼職，搵多少少錢。」
快艇一隻變三隻
林映熹邊學邊做，很快便上手，未夠半年，兩人合股買入另一艘快艇。一季之內，何柏奇的快艇由一隻變三隻，生意依然應接不瑕，但收入不足以當全職工作。「去年尾有次開工遇上遊艇船主，他表示想賣艘遊艇，叫我幫手留意下，我諗諗下覺得做得過，但一個人攞唔出百五萬，於是搵阿熹傾。」買二手遊艇需一筆過付款，兩人積蓄有限，需向家人借貸，「哈哈，真係屋企人話ok就ok！之前幻想將來我哋諗到好興奮，到真正成事時先識驚！」
經營遊艇比快艇複雜得多，何柏奇和林映熹認為要做得好必須全身投入，因此雙雙辭去設計工作。
「我做咗十幾年設計，近兩三年去到樽頸位，開始唔想做。以前公司主要做品牌客，日常接觸好多marketing嘅人，見到佢哋將自己精神、時間付出哂畀啲大企業，幫公司賺錢，但公司根本唔會理你嘅人生、健康，我見佢哋成日做到十一、二點，假期都要做，即使人工高又如何﹖點解我要為你賣命，完全犧牲哂自己生活﹖我初入行時都以為咁係理所當然，啲客六、七點開完會先叫你做嘢，然後問你聽朝九點有冇！我近年會諗，呢啲工適唔適合我﹖就算做設計，係咪唔應該做大企業，可能幫非牟利機構做會更有意義！」
小巧精緻成賣點
踏入出海旺季，遊艇的檔期已排到8月，何柏奇指生意比預期理想，「4月本是淡季，但我們間中也接到單，試過載幾個法國家庭，共6個大人和5個BB去蒲台島食飯游水，收費8,000元。」旺季價錢提升，全日船租大約1.5萬元，「5月有10日出船，6月有16日，7月所有周末周日早喺一個月前已full哂。」
他們的遊艇可容納38人，屬中小型西式遊艇，第一手船主是城中富豪，船上設施較豪華，小巧精緻頓成賣點。「市場上嘅西式遊艇比較大型，可容納四、五十人，但有啲客人少，想船靚，又唔想太貴，令到我哋呢類船有生存空間。我哋成日做六至十個客，最少一次兩個人，上船求婚。」
由日日坐辦公室，變成日日揸船開工，兩人異口同聲表示最大挑戰是體能：「以前坐得太多，唔習慣體力勞動，現在船上所有大小事務都由我哋一手包辦，小至貼防滑墊、倒垃圾；大至洗船、髹油，好多手板眼見工夫，未做過就有難度。」何柏奇指其他行家收船只需一小時，他們要多花一倍時間，不時被行家取笑。
雖然工作辛苦，不過打理自己船，再難捱都毫無怨言，「試過有客開大，唔止塞廁所，仲整到成幅牆都係，我哋要落手落腳清潔。呢啲厭惡性工作我哋未做過，以前只係砌版，現在要執屎，如果係打份水手工一定爆哂粗，但現在我哋覺得好搞笑，笑騎騎去做！」
