上星期六美洲盃八強，烏拉圭喺法定時間共有三個入波被判無效，同秘魯賽和0:0，蘇亞雷斯互射12碼首位主射即射失，最後烏拉圭互射12碼以4:5不敵秘魯，無緣四強。
烏拉圭喺呢場八強比賽佔盡優勢，但喺比賽度三次破網都喺視像裁判（VAR）發功下被判無效。包括迪阿拉斯卡達喺29分鐘嘅入波、卡雲尼喺59分鐘嘅入波，同阿蘇喺73分鐘嘅入波。
兩隊喺90分鐘後賽和0:0，由於八強冇加時，雙方直接互射12碼決勝負。先射嘅烏拉圭第一輪由阿蘇操刀，但佢主射嘅12碼俾秘魯門將柏度加里斯撲出，剩低嘅烏拉圭同秘魯球員全都順利射入，結果秘魯互射12碼贏5:4晉身4強，會同對上兩屆冠軍嘅智利爭入決賽。
至於近日傳有望回歸巴塞隆拿嘅尼馬，喺ig安慰阿蘇：「兄弟企起身，你好勁，我愛你！」
