過去一直促特首林鄭要盡快落實送中惡法嘅民建聯，喺林鄭面對過百萬民意反對而宣佈暫緩立法後，最近除咗唔敢再提自己支持惡法嘅立場外，更喺街上掛上一啲寫有「反暴力 撐執法 改善施政 重建互信」嘅橫額抽水。民主黨副主席、南區區議員羅健熙噚日睇到民建聯呢張橫額就眼火爆，喺facebook撰文話如果民建聯喺6月9日103萬人上街後，即時轉軚反對「送中」惡法，政府就唔夠票過立法會，「咁點會有之後嘅衝突場面？市民點會受傷甚至自殺？你哋（民建聯）最鍾意嘅警察點會受傷或者日日被市民侮辱？」
羅健熙轟害足香港廿幾年
羅健熙其後更激動話，若非民建聯咁多年來都飲中聯辦奶水，一日到黑乜都撐中聯辦，「香港會有咁L淒涼悲壯？害足香港廿幾年就係你班人渣呀DLLM。你估啲血你冇責任？民建聯你地（哋）食屎啦。」
南區區議員、民主派立法會議員區諾軒亦話，民建聯作為執政陣營一部份，一開始食人血饅頭話要解決台灣殺人案，做咗支持《逃犯條例》嘅先鋒，「出晒事而（𠵱）家你走黎（嚟）同人講重建互信？」佢批評民建聯呢班人係全無人格，「重建互信就請你哋解散民建聯，全面退出政壇，唔好再害香港人」。
李八方