【本報訊】特首林鄭月娥上任兩年，私樓樓價一度衝上歷史高峯，樓價累升17%。儘管林鄭聲稱正視市民上樓難，現實卻是市民勒緊褲頭仍是無殼蝸牛，居屋繼續爭崩頭，私營地皮比例減少撐住樓價。業界批評林鄭房策未能緩和高漲的置業情緒，在房策成績上交白卷，處理房屋問題形同將膠布貼在流血不止的傷口上。
按差估署資料，林鄭2017年7月上任之時，樓價指數達當時高位337.5點；至上月指數更上一層樓，上升至新歷史高位396.8點。
如果跟前任特首比較，樓市大好友祥益地產總裁汪敦敬說：「佢有好大勇氣做大project，例如明日大嶼，但佢忽略咗短線供應，前任特首會見縫插針（起樓），林鄭好明顯唔buy，但政策上長短供應都應該有，如果冇短線一齊醫，長線都冇實在嘅感覺，係好冒險，所以𠵱家長不成、短不就。」
對於林鄭未來如何於房策上救亡，汪認為「林鄭nothing to lose」，「我做咗十幾年房屋政策建議，我知道冇得救，因為救到嘅嘢個政府唔肯做，所以我知樓價升……佢應該用另一個方法去問持份者，唔好問佢制唔制，因為好大機會話唔制。應該問吓佢哋乜嘢得，高球場要一半咪一半囉、或者發展郊野公園嘅1%，已經畀好多10萬人住到，𠵱家應該睇有乜可以做，而唔好諗乜唔做得」。
「娥六招」無助短期供應
土地供應上，去年「娥六招」將公營對私營房屋比例由六四比改為七三比，汪認為此舉出發點好，「『七』對於公營房屋係好消息，但係冇供應配合嘅情況下，『三』對於私人市場上，係向發展商派定心丸，睇好未來樓市走勢，所以我認為佢係宣佈得早咗，後續力上可以話係交白卷，因為即使公營房屋變七成，但係冇地的話，公營房屋供應都係唔夠」。
一手樓銷售方面，「娥六招」中提出空置稅及首批須賣總數兩成單位，近期亦限制新盤招標手法。汪認為政策推出後，發展商與政府有互動，做法相當正確，甚至對於招標的關注，但他認為「遲咗啲」、「做得唔夠貼」，「買樓係眾目睽睽下好多市民參與嘅嘢，任何銷售方式、不論新舊，如果因為技巧令市民睇唔晒成個藍圖，其實已經違反咗一手銷售條例」。汪說：「政府應該鼓勵業主一換一，將細單位放出嚟，幫助更多小市民上車，當細單位供應多咗，個價自然會微調或者受到抑壓。」
中文大學商學院客席教授冼日明認為，空置稅只會令發展商減慢推盤步伐。往後發展商應會調整建築期而非加快推新盤，因他們知道市場消化能力有限，不希望避過空置稅而令成交價下跌；即使預售樓花方案要求推盤量不少於兩成，變相鼓勵現時發展商普遍以招標方式賣盤。
■記者陳寶恩、宋佩恩
