有「書生歌手」之稱的莫旭秋，多年來一直兼職做歌手，其實他唱歌只為興趣，皆因他曾開旅行社做老闆，早已買豪宅生活無憂。不過，表面上一帆風順的他，原來曾經歷男人最痛，與他同居29年的女友及母親在兩年內相繼離世，令他一度失去生活意義。
撰文︰祖李
攝影︰陳慧安
擅長唱懷舊國語歌的莫旭秋，曾開設旅行社，早已生活無憂。風光背後，單身近十年，是因為心繫過世十年的女友，日前莫旭秋接受《蘋果》專訪，提到摯愛依然念念不忘：「我哋1978年拍拖，大家因為工作經常飛嚟飛去，聚少離多，一個月都係見得幾日，加上兩個都唔想生小朋友，所以共識唔結婚。」
莫旭秋說女友在2009年因突發性心臟病離世︰「突然有一朝我接到醫院電話，通知我佢喺街暈倒，由途人送院，因為佢電話有我手機號碼，佢哋就打嚟，但我趕到醫院已經見唔到佢最後一面，係好遺憾，原來佢一直瞞住我有病。」
唔夠靚仔入行
最傷感時，莫旭秋甚至將兩人的合照全部扔掉，以免睹物思人，豈料兩年後，他另一個摯愛的女人也離他而去。他說︰「2011年開演唱會，係我人生最痛苦，我喺中秋節正日開騷，媽媽6月入咗醫院，個幾月就離世，我同兩個姐姐期間輪更睇住佢，嗰陣又要宣傳同練歌。」女友及母親的骨灰，他選擇海葬，他計劃將來自己的骨灰也會隨海飄蕩，與摯愛再聚，皆因大家生前都愛周遊列國。
自小喜歡唱歌的莫旭秋，在1974年跟張伊雯老師學唱國語流行曲，學了半年，他就瞞住老師參加歌唱比賽摘冠，翌年再於商業電台全港唱歌比賽再奪冠，又曾在無綫《聲寶之夜》及麗的《平步青雲》等節目演出，但依然沒有唱片公司簽約︰「我當年冇入行係因為唔係高大靚仔，自知唔可以靠唱歌搵食，不過當時何家聯搵我入《歡樂今宵》，我就業餘唱國語時代曲，但因為嗰陣考咗入航空公司，工作好忙，要唱live我冇時間練歌，所以唱唱吓都冇唱。」
坐擁半山豪宅
後來莫旭秋轉入旅行社工作，幾年後就自立門戶做老闆，很快就搵到人生第一桶金，現在更坐擁位於西半山的1,400呎豪宅︰「旅遊業頭十年、八年真係好搵錢。1975到1991年，我連歌都冇聽，全情搏殺做生意，飛嚟飛去搵錢，1992年我至唱番歌。」2008年莫旭秋首次開個人演唱會，2016年他更結束旅行社生意，全情投入唱歌事業，今個月他將再度開騷，並邀得好友何婉盈及吳麗珠等做嘉賓。
場地提供︰如心艾朗酒店
父兄酗酒早逝引以為鑑
莫旭秋70年代參加歌唱比賽，應該已年逾60歲，但見他保養得宜，他說自己勝在生活有規律。因眼見父親、兄長酗酒早逝，令他引以為鑑︰「我父親離世嗰陣，只有53歲，因為爺爺開酒舖，所以爸爸每次開飯前慣咗飲烈酒，佢走前喺醫院劏肚，醫生話佢條腸穿咗，好似水喉咁，啲血周圍標，留院唔夠一個月就走咗，我大哥跟足老竇食煙飲酒，45歲就離世，所以我對食煙飲酒好抗拒。」
近日在莫旭秋身上，發生了一件巧合事，早前有人向警車掟氣油彈，肇事車輛的車牌竟跟他的平治座駕車牌號碼一樣：「管理處有職員問我端午節去咗邊，我咪話去電台做直播節目後凌晨12點前返咗嚟。佢再問我有冇用車？我就答『冇！嗰日有人車我。』」幸好警察到停車場調查，閉路電視證實他當天沒開過車。