攞景定贈興？又係漢奸？7·1係乜日子先？好寫唔寫寫日本正成咁；回歸紀念日呀，大佬！
唔讚病特區，唔讚強祖國，都唔好長他人志氣、滅自己威風呀？
非也，錯怪了！
0%俊傑，再不識時務，也不會揀今日抬舉別人，為日本拍馬屁……既非親身飛日本幫襯傳統米鋪，指定富山出產，即磨米粒才肯用來煮飯。也非個個月、猶如經期準時必飛日本起碼一次之物類。更非當日本係故鄉，一年出門大不了三、四次，如若四次；日本三次、泰國一次。難怪成田機場東急地鐵問津處的姐姐跟我用英語聊到第三句，忽然Nicam轉廣東話……聽清楚，然後問：點解唔係普通話？
姐姐甜笑回答：嚟日本、尤其東京嘅香港人幾乎多過自己日本人外遊歸來，觀眉目、聽語音，唔多唔少八、九成準確，估到係香港人；再者，曾經住過香港，學過廣東話囉！
嗱，上面幾則日本癡才算標準，在下掹車邊，年中來日本一次起兩次止。揀冬天、尤其隆冬時分貪遊人略少，拆蟹吃魚飲湯熱清酒，泡溫泉，有雪賞雪、無雪觀雨，這份淒清除了日本別處難及；曾經蘇州、杭州、湘西，甚至番禺中山交界的水鄉都感受過，可惜質素愈行愈遠，追回失去幾十年的情緒，超英趕美賽摩登被離散，從此失落。
陪同伴來橫濱開會，日間無事，乘JR西行鎌倉不用半小時。對上一次跟梅卓燕來過，快廿年，當時探望、觀賞Pina Bausch演出而來；離世好幾年囉，Pina。
步出車站，直覺前面鎌倉大佛，小路未算寬敞，滿佈精緻小店，時停時灑煙雨濛濛，很偶然才碰上一兩個行人，猶似路上散播骨董店的數量。環境乾淨叫人佩服五體投地，六月底七月初紫陽花（繡球花）承接櫻花、菖蒲盛放，不論是人家還是商鋪，一家接一家或多或少爭出彩，這番平實華美相比京都的雕琢、是另一種窩心。
邊走，目不暇給邊欣賞邊拍照，忽爾雨下急速，閃入咖啡館兼書店House Yuigahama；一杯caffe Latte，面朝偌大向街玻璃窗，偶爾看書，多數望時疏時密雨。不禁嘆息；聽說經濟仍然景氣，這個國家的氣質看來無半分被打擊，軟實力國比國比死人，想來想去不明白：日本點解始終正到冇人同？