【財經專題】會考只得1分的陳胤華（Jaguar），畢業後擔任女裝鞋推銷員，憑其三寸不爛之舌成為Top Sales，之後「升呢」做批發，03年再北上開店，年賺200萬元。不過，淘寶等網購平台殺到，打殘小店。生意失敗，打工卻遇公司執笠變失業，成「雙失中佬」。兩年前他重操故業賣女裝鞋，開設網站女鞋國，憑每周開fb Live賣女裝高踭鞋，令37歲「中佬」成為男網紅，直播人數過千，高峯期兩日內賣出逾1,600對鞋。
記者：陳新政
男士做網上直播推銷女裝鞋，看似匪夷所思，但Jaguar推翻一切認知，「當初我去見工時都唔知係賣女裝鞋，但返工後發現，啲女士聽我講嘢多過其他女同事，佢哋覺得男人讚好睇，會受落好多。」兩個月後便成為公司Top Sales，獲行家賞識，加入批發團隊。
他之後跟表哥北上，在汕頭開鞋店。2003年網購未盛行，中低檔價錢的女裝鞋像印鈔般賺錢，「每一年都賺到200萬，只係一間舖，之後梗係推落去，再開分店啦。」高峯期，開設4間自營店，另有4間加盟店，更投資開設山寨廠。
5年後，淘寶殺到，但他仍然深信顧客要現場試鞋，拒絕開網店，「我覺得賣鞋嘅網店冇得做，你唔落舖試對鞋又點知啱唔啱着？」結果生意一落千丈，頭一年生意額跌三成，第二年加盟店退出，「去到第三年我同佢鬥氣，捱到第4年結果4間自營店都執晒。」
在垂死掙扎的邊緣，他接到一個上海大客，一位網紅訂做4,000對鞋，「心諗不得了，即刻開機造鞋，當時興奮沖昏頭腦，冇諗過自己條件符唔符合人哋標準，好自信滿滿咁交貨，點知QC（質檢）人員落嚟查貨，佢話『左右腳踭相差2mm唔得，絹布有陰陽色唔得，膠水滲出唔得，鞋底污糟唔得！』佢講咗好幾句唔得後，我問佢究竟仲有咩得，佢答我，『好老實，冇一樣得！』，喺嗰一刻，好似行雷劈落個頭到，我想死咁滯。」
「雙失中佬」賣樓再創業
因為該張合約寫明，要45日內交貨，每對鞋價值399元，即該批貨總值160萬元，「因為佢啲鞋預售晒，交唔到貨我要賠160萬，我即晚訂咗翌日機票飛上海，再向老闆求救，佢就話見我對鞋有認識，再找我做採購，只要我放棄手上所有事業，我梗係應承啦，佢就即場係我面前撕爛份合約！」
工作近一年，其後因網紅公司內部改組，他又變回無業遊民，回港Hea足8個月，「後來發覺要再博一次，就問老婆可否賣咗深圳層樓，當借100萬畀我去再創業。」
Jaguar再做女裝鞋生意，他已由最初鄙視網購，到拜服網購，皆因見證過內地網紅發威，在14秒內達成800萬元收入。上次網紅定單令他上了一課，於是由以往做平價貨，轉為中高質貨。現時一對高踭鞋售賣500至700元不等，而且不會用其他途徑推銷產品，只會在直播中介紹鞋款，開業初期，第三個月只賣出24對鞋，下個月增至120對，第五個月賣300多對，直到最近高峯期，一個直播在兩日內便賣出1,600對鞋。
每周開fb Live介紹新貨
走入女鞋國的辦公室，擺滿數百個鞋盒，訪問當日已有過百對鞋包裝好準備出貨，Jaguar受訪時Sales上身，言談間不經意地推銷，滔滔不絕，難怪成為賣高踭鞋的男網紅。「大家都叫我鞋佬，我每星期五晚都會開fb Live，即場介紹啲新貨，48小時內係售賣黃金期，其餘日子我係唔使Sell嘢嘅。」目前生意穩定上升，但盈利遠遠未追上當年北上的風光年代，他計過數，只要能月銷6,000對鞋，「我就可以買返層樓畀老婆，對佢有個交代啦！」