【回歸/戀殖】
皇室日用品如事頭婆掛畫，則大多屬英國產品。加冕後女皇掛畫款式逾十款，每次頒令「換畫」，舊一幅都由殖民地保存，輾轉流落民間。港督府的碗碟亦產自英國。「港英品牌」創辦人譚志成（Juston）介紹他手上的喬治六世杯碟套裝，「最近有啲人復刻一批金色邊嘅白色杯，上面寫住HK，有個皇冠喺度。皇冠HK係代表香港政府，但係港督並唔係代表香港，佢係代表英國君主。我手上呢隻杯，下面係Government House，即係港督府。」GRI即Georgius Rex Imperator，喬治五世、六世俱採用此徽記。另一款士多啤梨圖案餐碟，二戰前款式，「係當時英國家庭常見嘅款式，碟上印上港督府字眼，英國出品，係宴客用。每去到一啲比較高級啲嘅嘢，佢哋都會用返英國廠製造。」
日佔前港督府 米字旗天花
Juston還收藏了一套愛德華七世（1901-1910在位）的杯碟，注重花巧細節。「外國回流返港，大約一部iPhone嘅價錢，唔係好貴，爭在你識唔識睇。」方才提及的士多啤梨圖案碟，據知來自前港督府員工。「以前港督府唔似而家咁多限制，每次新港督上任，都會重新佈置，甚至搬埋英國老家嘅傢俬嚟香港；搬得嚟香港，當然亦攞得走！」
談起港督府，Juston不勝欷歔。他收藏了兩幅1890年港督府照片，一張客廳，一張飯廳，格局仍在，但佈置已不同。「港督府主要用嚟接待外賓，客廳好講究，天花板係模仿英國米字旗，牆上掛君主畫像，英國每個殖民地重要建築物都會掛，喺香港已失傳。」港督府建於19世紀中後期，至二戰前已頗殘舊。日佔時期，日軍將港督府大規模改建，英式陳設裏裏外外被改頭換面。和平後，港督楊慕琦盡量還原英式佈置，變成英日夾雜，「而家加埋現代嘅傢俬，就變成一間茶樓喇！」Juston苦笑。
採訪：吳佩思
攝影：劉永發