特首林鄭月娥之前一直龜縮拒面對公眾，但私下閉門會見警察工會及建制派人士，除表明不對民意訴求再讓步、不以獨立委員會調查警方暴力對付示威人士，更傳達中央仍力撐她做特首、不會辭職下台的訊息。有政界中人指，現時對林鄭的最大威脅並非民主派追擊或民望災難式下瀉，而是建制派「作反」，所以那些言論根本不是對香港人說，「佢係對建制派講，想用中央仲支持佢鎮住班建制派，否則佢乜民生政策都唔使做」。
該政界中人直言，林鄭心知肚明在現時局面下，中央根本不容她辭職，「林鄭同友好協進會成員見面時話，好多人以為佢死咗，但佢唔會死得去，其實應理解為好多人以為佢已經俾北京政治上判死刑，但北京其實唔會畀佢死住」，林鄭亦知北京要她收拾好反送中這個殘局，「但問題係從麥美娟爆粗鬧佢都知，建制派根本嬲到佢死、甚至唔再畀面佢，冇建制支持，佢連收拾殘局能力都冇」，早前立法會一個委員會通過暫緩禁止電子煙及加熱煙的議員動議，明顯與政府唱對台；立法會司法及法務委員會更罕有地通過民主派動議，要求全面檢視《公安條例》，當時會上大部份建制派議員均缺席，「可以睇到建制派已開始作反，唔睇林鄭、政府台戲」。
無建制支持難收拾殘局
該政界中人稱，林鄭要在餘下日子維持管治力量，「即使再得罪香港人、民望再跌，佢都要拉住建制」，所以才要拿中央仍全力支持她，逼令建制派不能反她，「其實又係嗰一招：反佢（林鄭）即係反中央」，問題是有建制中人也抱怨，若再要建制死撐林鄭，「年底區選根本唔使選」，所以該政界中人笑言，目前最想林鄭死、最想她下台的其實不是民主派，「建制派比民主派、香港人更想林鄭下台，因唔係林鄭死就係建制亡」。
季陶
周一、三、五刊出