曼聯上季英超得第六，下季無份踢歐聯，又經歷過換帥風波，雖然場外商業收入照舊強勁，上年9月仲以6億鎊刷新收入紀錄，但都係頂唔住股市下挫，球會市值較10個月前跌咗成35%，蒸發達10億鎊（約100億港元），要止跌回升紅魔就想靠英化，有傳買完兩個英人小將後，仲想買阿士東維拉嘅蘇格蘭中場約翰麥甘尼，但維拉標價成5,000萬鎊！
曼聯喺紐約證交所上市，近一年股價就同戰績一樣插水，上年8月每股仲值27.7美元，當時市值係35.1億鎊，不過上星期五收市後，已經跌到得番18.08美元，市值大概係22.5億鎊。有曼聯球迷上星期六喺奧脫福外街道示威，希望股價不振會造成賣盤壓力，逼使2003年入主嘅格拉沙家族肯賣走曼聯。
曼聯孭緊50億街數
事關曼聯家陣仲有五億鎊負債，16年前格拉沙家族借7.9億鎊入主紅魔，到家陣曼聯用咗超過10億鎊嚟還債同畀息，球迷認為咁係嘥咗球會本應用喺引援嘅資本，亦認為格拉沙家族嘅管理方式係紅魔衰落嘅元凶。雖然紅魔今夏已用咗差唔多7,000萬鎊簽入雲比沙卡同埋丹尼爾占士，不過球迷仲係勁不滿，而紅魔領隊蘇斯克查就一路想搞英化同年輕化，所以係咁買英人小將，今次目標就係維拉24歲中場約翰麥甘尼，呢位蘇格蘭國腳喺5月英冠升班附加賽攻入1球幫維拉升班，身價要成5,000萬鎊。除咗麥甘尼外，亦有傳蘇B睇中咗士砵亭嘅波基斯費南迪斯、紐卡素嘅桑恩朗達夫，同埋馬德里體育會嘅沙奧尼古斯。
曼聯自費格遜退休後都亂咗好多年，前隊長朗尼就話，佢合作過嘅最佳主帥，竟然係雲高爾，而唔係費Sir、卡比路、摩連奴等，不過到家陣曼聯內部仲有唔少問題，據英國《太陽報》報道，中場保羅普巴今個星期會私下求蘇B放佢走，甚至叫蘇B幫手打動行政副主席活華特放人。普巴希望可以喺7月13號首場季前熱身賽前走人，據報皇家馬德里同祖雲達斯都對普巴有興趣，但就未有報價。
普巴想喺熱身賽前離隊
講開普巴嘅去留，甚至可能影響到新嚟嘅21歲右閘雲比沙卡，事關一手提拔佢成材嘅水晶宮青年軍教頭李察梳爾，就指雲比沙卡係現代版嘅艾殊利高爾，話佢生性怕醜，好易俾更衣室大佬影響，初初升上一隊，試過跟咗韋費特沙夏走去飲酒缺席操練，怕普巴唔走會帶壞佢。