阿根廷上周五喺美洲國家盃半準決賽表現明顯有起色，以2:0贏咗委內瑞拉晉級4強，將會同巴西爭入決賽，呢場南美宿敵對決真係令人期待！阿根廷今仗喺上半場10分鐘就先開紀錄，美斯開出角球，阿古路起腳後有拿達路馬天尼斯喺門前加一腳射入。佢哋換邊後喺74分鐘把握對手門將甩手，由後備入替嘅盧斯素輕鬆射入空門，最終阿根廷贏2:0，晉級四強後會對巴西。
