【本報訊】中美貿易戰由去年3月開打至今，陸續有於內地設廠的公司將生產線撤出內地，但搬廠說易行難。羅兵咸永道中國稅務及商務諮詢部合夥人王舜宜接受專訪時表示，廠家需考慮關閉內地廠房的成本。「如果解僱員工，需支付經濟補償金，基本上你做滿一年就要賠一個月嘅工資；個廠點樣dispose（處置）都係問題，或者有塊地嘅話，都要諗點處置，需要時間」。
遷東南亞易水土不服
葉氏化工（408）雖然不是因貿易戰才搬廠，但管理層今年4月與傳媒會面時曾分享指由於廠房搬遷和業務整合，需依足內地勞工法例裁員，員工補償費金額約3,000萬至4,000萬元。
搬廠亦要考慮勞工成本及效率問題。王舜宜說：「去邊度設廠好啲呢？可能你要佢做一啲固定簡單嘅工序，去孟加拉、柬埔寨係適合；但如果你要做複雜嘢，例如有啲客做電子嘢，佢哋覺得越南啲人熟練聰明啲，因為已訓練咗唔少人出嚟」。
王表示，最近有從事電視屏幕產品供應鏈管理的客戶，詢問美國、墨西哥及越南設廠分別，「我哋都要分析廠房、工人成本、工人勞動力、當地政策、設立公司的區域選擇等」。
事實上，一些廠家到東南亞設廠曾經歷水土不服。「好多年前，曾經有製造高端產品的客戶去越南設廠，過咗3年之後執咗，因為佢發覺溝通時間好費時，成日要派人員搞培訓，亦找不到合適嘅管理人員」。
■記者邱曉欣、黃碧基