圈中夫婦「布冧」同「阿青」齊齊上節目大談相處之道，喺鏡頭面前當然好恩愛，你點就我，我點為你，直頭係模範夫妻。不過事實上，布冧經常喺外面搞搞震，偷食N咁多次，不過老婆因為唔想離婚，惟有啞忍唔出聲，仲要成日同老公做大龍鳳，扮幸福小女人。
其實阿青拍拖初期已經成日去片場贒住布冧，但大家各有工作，冇可能24小時全天候睇到實，所以布冧成日有機可乘，背住阿青媾女。有次布冧仲唔熟唔食，偷食阿青好姊妹「雯雯」，搞到阿青嬲爆即同雯雯絕交。
阿青份人好緊張布冧，只要布冧有乜風吹草動，佢都會反應極大。不過阿青有樣好，無論布冧偷食幾多次，佢都會原諒對方，而且會將責任歸咎去啲女人度，覺得係人哋勾引布冧，老公只係抵受唔到誘惑至出軌，或者係啲豬朋狗友帶壞布冧。有次布冧去外地搞出事，阿青就打去搵「高人」，鬧咗人哋一大餐，話佢帶壞自己老公。
近年布冧似乎收斂咗風流個性，但查實佢只係偷食小心咗。唔知算唔算係鴕鳥，阿青份人要面又唔輸得，總之就唔會同布冧離婚，就算知個老公風流，咪隻眼開隻眼閉囉！
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。