Madam Lo盧宛茵做戲做得多，最近連棟篤笑都被她征服了，8月中將在麥花臣開個人棟篤笑，66歲之齡首度踏上大舞台開騷，都可算是一個紀錄。
紀錄不止這個，主辦單位還為她「飾演最多男藝人的母親」這個項目申請健力士世界紀錄大全，雖不是甚麼驚人創舉，但由當年《鬥氣一族》演周星馳搞笑阿媽，演到現在《鐵探》姜皓文的腦退化母親，這位「御用阿媽」唔係講笑。Madam Lo說：「我自己都計唔到，從影咁多年，有啲反而係佢哋記得，話Madam我做過你個仔㗎！」
這位無論螢幕上和私底下都是真慈母的盧宛茵，當然不會流鱷魚淚，做阿媽只想仔女開心，她說：「我唔會話控制佢哋呢樣得呢樣唔得……我係從來唔會打仔女，我只會講（道理）畀佢哋聽！」
真慈母從來不需要「好打得」。
撰文：文嘉龍
攝影：陳慧安
圈中第一個契仔鄭敬基
將舉行的棟篤笑騷除咗笑，Madam Lo仲會唱，話說回來又關《流行經典50年》的事。Madam Lo早前在節目中開金口唱了首Jazz味十足的《It's A Sin To Tell A Lie》，令人大讚驚喜，估唔到聲音充滿磁性咁動聽，網民仲話Madam Lo要攞今年新人金獎㖭！
Madam Lo說自己一直鍾意聽英文歌，如果有機會她想搞搞新意思唱吓日文歌，訪問時叫Madam唱兩嘴，她靈感一觸即刻唱出澤田研二的《時の過ぎゅくままに》，「新嘅我唔識㗎，嗰啲老餅日本歌，例如澤田研二吖，嗰隻叫乜呀？即係阿B（鍾鎮濤）嗰首《讓一切隨風》呀，但係日文版係澤田研二，嘩，我唔係好記得，𠵱家唱呀？我唔係好記得，約莫㗎咋！」
歌詞唔係好記得不緊要，反正日文嘛，要唱到感情爆燈先攞你命，演慣戲的Madam Lo交足戲唱出味道，「嗰時讀藝訓班有導師教唱歌嘅，考試嘅時候要唱㗎，要pass㗎！我記得秦燕老師嗰時就教我哋唱鄧麗君嘅歌。我記得有一輪拍完《季節》都有去美國登台，因為嗰陣時《季節》都好哄動，係美國嗰邊邀請我哋；好似《卡拉屋企》都係咁，拍完又係去美國登台！」
自言鍾意拍戲又鍾意唱歌的Madam Lo，天性樂觀更愛搞笑，「我好鍾意搞笑，我個人係比較樂觀，可能我性格係大情大性啦，啲嘢（唔開心）過咗去又唔記得，我有陣時拍戲都係咁，拍完就唔記得，有啲人話你拍戲會唔會抽離唔到個角色，我話拍完都唔記得喇，又拍第二套啦！我性格就係咁，唔會樣樣嘢都記住。」
連演過幾多個男星的母親，也多到數唔盡，「周星馳、古天樂、姜皓文、羅嘉良、郭晉安、尹揚明，一路數呀，林偉，近期就有余德丞，黎諾懿，徐榮……溫兆倫，要諗番真係好多呀，仲有楊明，諗吓又有諗吓又有，呂方都做過我個仔，歐陽震華、苗僑偉，哈哈，越講越多。佢哋個個都好尊重我、好照顧我嘅，好似有時我掛住化妝趕入廠，楊明好乖仔，佢會問阿媽，食咗飯未呀？佢就會上去canteen買嘢畀我食。好慶幸囉，個個仔都對我好好！」
最近還多了一位契仔，就是鄭敬基。「我認咗佢做契仔呀，圈入面第一個契仔，我哋拍《卡拉屋企》嗰時識，我嗰時仲問呢個邊個嚟，未見過佢，因為佢好似係第一套劇，後尾又冇乜聯絡，大家各有各，佢又去咗加拿大，後尾返嚟先聯絡番。」
我啲仔女好自由好Free
演盡無數母親角色，本身有兩子一女的盧宛茵，講到與兒女的相處之道，她說自己是個開明母親，從來不會干預子女的發展和決定。「我唔嚴嘅，我啲仔女好自由好free，我唔會話控制佢哋呢樣得呢樣唔得，同埋佢哋從細我都冇鬧佢哋，咁多年都冇，我係從來唔會打仔女，我只會講（道理）畀佢哋聽，嗱，如果你唔讀書，你第日可能就會咁咁咁喎，你讀好啲書又會點，我會講解畀佢哋聽囉！全部都係由佢哋自由發揮，所以我啲仔女好自立，好似佢哋喺外國讀書，所有嘢都係自己搞掂，細細個已經好自立㗎喇！」
Madam Lo說自己近年在電視劇中，大多是演單親家庭角色，巧合的是，她本身也是單親獨力湊大兩子一女。盧宛茵在1975年與香港第一代新聞主播何鉅華結婚，87年她重返大台演出《季節》三姑姐一角，翌年便離婚。
獨力養大子女係咪都好辛苦？「都係㗎，所以都好多謝公司呀，多謝TVB啦，一直都有工做，可以供書教學咁樣囉！」
離婚後單身多年，完全冇打算過再婚嗎？「呢啲順其自然啦，唔可以強求嘅，隨緣啦冇所謂，我都單身咁多年啦真係，獨身自己一個咁多年，我都好enjoy，起碼我有一份工，我又兒孫滿堂（四個孫），呢啲我覺得係睇命運安排，我好順其自然。」
感情可遇不可求，天生樂觀的Madam Lo最信命運，她說：「我好信命運，命運安排到你譬如識到呢個識到嗰個，條路點樣走嘅，都係命運安排，我覺得係咁囉，有陣時我自己好想要乜乜乜，可能又未必係咁，好自然呀順其自然隨遇而安，可能又唔知會點，所以其實冇得強求，可遇不可求。」
閒時弄孫為樂，不用拍劇的時候，自由自在。「我又好enjoy我自己一個人，好自由去做任何嘢，譬如有啲結咗婚，做乜嘢都要問過個老婆；有啲女人又要問過個老公，我𠵱家幾咁自由呀，我鍾意去邊就去邊，飛去邊度旅行又得，自己鍾意點都得。」
時光飛逝恍如昨日
開通阿媽萬事最緊要仔女開心，「以前我個仔同我住，有一晚佢突然話阿媽，我結婚喇！我幾咁開心呀，一聽到即刻話好呀好呀，問佢定咗日子未呀，咁全部都係佢哋自己安排囉！所謂人生行嘅路就係咁㗎啦，我覺得人嘅一生就係出世，受教育，跟住你有你嘅事業，跟住結婚生兒育女，嗰條路就係咁行㗎喇，我覺得必經嘅階段就係咁樣。」
由讀書選科到結婚大事，Madam Lo都交由子女決定，「我唔會干預佢哋，但係最緊要我同佢哋講，唔好學壞，例如毒品呀犯法嗰啲就梗係唔好啦，其他讀書呀、你嘅事業，將來你自己嘅家庭，就佢哋自由發揮，你鍾意向上爬定鍾意原地踏步，呢啲你自己諗啦，咁佢哋又好識諗嘅！」
入行46年的Madam Lo，中學畢業後原本打算做白領儷人打寫字樓工，結果報讀了無綫的藝員訓練班，從此改寫人生。當年同屆訓練班的同學有吳浣儀、伍衛國和宋豪輝等人，好多人早已各散東西，唯獨Madam Lo長做長有。
Madam Lo呢個名也一叫三十多年，「我記得係八幾年拍《季節》嘅時候就入廠啦，有個FM（幕後人員）問我點樣稱呼你好呀，叫你茵姐啦，我好怕嗰啲擺款呀有架子咁，我唔鍾意，我話唔使叫我茵姐喇，你就咁叫我個名啦，佢話咁係咪盧小姐呀，Miss Lo呀，我話咁又唔使咁生保，咁佢話不如叫你Madam Lo啦，就係咁叫到𠵱家喇！」Madam Lo的英文名其實叫Angelina！
愛唱英文歌的Madam Lo，歌如人生，入行46年由《朱門怨》的二少奶演到今天《鐵探》的腦退化母親，她說《As Time Goes By》這首歌有如她的演藝生涯。「我有一首歌好鍾意嘅，係《As Time Goes By》。好似《卡拉屋企》咁眨吓眼廿幾年喇（28年），有時自己諗起好似恍如昨日讀訓練班咁，眨下眼讀完畢業入娛樂界，眨吓眼又咁多年，真係時光飛逝，過得好快我覺得！」
Madam Lo又即場唱起來了……
【後記】Madam Lo的IG
除了演慈母出色，盧宛茵的另一個經典是14年拍高登潮文而成的網絡短片《公屋．居屋．私樓》，白鴿眼外母被網民like爆，「拍嗰時我真係唔識乜嘢叫網，我淨係知道一係電影、一係電視，我哋以前係得電影同電視咋嘛，我話乜嘢係網劇呀？未聽過喎，真係大鄉里，佢哋話拍咗擺上網播，我話咁又好吖，我又鍾意樣樣嘢都試，拍嘅時候個個都係年輕一代啦！」
問她知唔知高登係乜？Madam反問：「高登係乜？即係網呀？哈哈哈，我唔知呀！」
Madam Lo不是汪阿姐，冇開IG更不會知道甚麼是「汪阿Tag」，記者向她說明，還說汪阿姐同司棋姐的IG都有好多人like，Madam Lo就話：「佢哋咁叻嘅，係咪有去上過啲乜嘢堂呢？我唔識呀，開咗咁會點呀？使唔使要登記好多嘢㗎？」
就係咁，凡事總有第一次，Madam Lo的IG就在訪問現場甫了第一張相，madam_lo_hk正式開戶了。
一路整Madam Lo一路問，「開咗呢啲IG，係咪個個都可以入到嚟睇呀？唔識都得？即係陳李張黃何都可以contact到我咯喎？賬號係乜我都唔知，真係要學吓先得！」
陳李張黃何……快啲去「科盧」Madam Lo先啦！
場地提供：香港九龍貝爾特酒店