彭定康那篇《林鄭下一步應該如何》好看極了，典型英國老頑童作風，深入淺出莊諧並重，一啖砂糖一啖屎，有碗話碗有仇必報，末代港督果然不是省油的燈，讀着教人一邊笑一邊流汗。一落筆坦言「我同佢唔係好熟㗎咋」，擺出主僕分明的架勢，容易受傷的玻璃心難免即刻中招，但日理萬機的舊上司又唔係想同佢行埋，的確冇乜理由特別關注一個平頭整面的下女，「我唔記得聽過有人講佢壞話」表面誇讚，潛台詞不外「又睇唔出不過不失都會平步青雲」。筆鋒一轉，寫如今四面楚歌的她「二零一七年獲委任行政長官，應該好清楚自己個位置」，事關當時呼聲比她高很多的對手曾俊華「犯了建議與雨傘運動學生領袖展開對話的致命錯誤……你諗諗，企圖說服批評者，而唔係打到佢哋屈服同拉佢哋坐監喎」，好使好用的二幫先至無情情升正印，「所以，由第一日開始，香港人都知道佢失去咗自我」。
請勿以為我把肥彭的話譯成梁醒波風格有陷害嫌疑，他老人家對港胞的一片丹心雖然毋庸置疑，可是語氣有明顯的不耐煩，接近「講嚟盞嘥氣」，估計忠言必定逆耳，睇死硬頸娥當佢冇到，遣詞用字反而肆無忌憚。譬如寫中央在百萬行和二百萬行後劃清界線，指推行惡法完全是林鄭自把自為，北京have hung Lam out to dry，就一點都不帶官腔，怎麼忍心板起面孔翻譯呢？這個「吊林鄭出去外面等佢乾」，畫面實在太精彩，假如搬上銀幕，大概只有塔倫天奴能夠勝任，《希魔撞正殺人狂》交疊《冰天血地8惡人》，嘩，一定拍爛手掌。