市民反送中條例取得初步勝利，逼使林鄭月娥「暫緩」之後，建制派發動文宣反擊戰，一位馬主在馬場見到左丁山，握住左丁山隻手：「幫吓手，拍多啲片放上YouTube。」雖然語焉不詳，但左丁山當然明白佢講乜。啱啱企喺左丁山隔籬係一位電腦設計師（相對於平面設計師），於是笑佢：「嗱，嚟馬場唔駛出聲都會有生意，我可以介紹馬主畀你識，等你同佢設計、拍片放上網絡。」設計師Y連忙耍手：「建制派畀錢我都唔做，佢地係好有錢，但入流嘅行家都唔肯行埋嗰邊呢！故此佢地的設計及方法，係呆滯啲嘅！」
設計師Y有錢都唔肯賺，抵佢仲未做馬主。左丁山就唔識打網絡戰，唔識拍片，平時唔睇YouTube，又冇fb地址，可算大落後，但起碼有度好，耳根清淨，唔駛花時間聽一啲豬噏。之係咁，不同WhatsApp群組係咁轉發建制派文宣、照片過嚟，有時刪都刪唔切。上星期有一位資深愛國報紙編輯轉發一份署名Agnes Chan的文字過嚟，左丁山問編輯：「係唔係大歌星陳美齡呀？佢都會寫呢啲嘢？」編輯答：「唔知係唔係，不過文章有道理，故此畀你睇吓！」有何道理？原來係鬧一百萬人上街不代表民意，似係屈才女、潘才女風格。今星期又有同學群組轉發過嚟，呢次講明係Agnes Chan香港才女陳美齡，哎吔吔，真陳美齡原來遠在非洲，在fb發表聲明澄清，話畀人冒名！左丁山一早估到啦，好奇怪建制派有大把錢畀稿費搵寫手，文章又寫得唔曳，夾敘夾議，的士司機睇咗，一定信。但點解要冒用人名呀，簽署陳大文唔得呀，冒認陳美齡有何好處？佔中時候，網上流傳沈祖堯、李純恩以至李嘉誠嘅文章，三人急忙否認，三個星期前，左丁山又收到李嘉誠帖文，為之啼笑皆非。
近日收到不少YouTube短片，大概唔怕畀人告，有人自拍評論短片，大罵黃毓民係黑社會，乜都鬧得出，又幾癲喎，現在有好多人上YouTube，唔睇TVB。YouTube就是香港人電視台，但呢個媒介，好易傳播不實不良信息及假新聞，思想不清，知識有限之人好易中計，將假嘢當係真蹟，美國法國有麻疹爆發不斷，其中一個原因就係女家長幾信YouTube偽科學影片講為兒童注射疫苗會引起自閉症，於是一於唔畀兒童打麻疹預防針。戈培爾話謊言重複千遍就是真理，現在建制派就係有錢不斷拍YouTube片！