《蘋果》曾將「優農良品」推銷手法向大律師陸偉雄求證，他看過講座影片後，直言是「低層次的詐騙手法」，並指事件涉及多宗罪行。
陸偉雄表示，《禁止層壓式計劃條例》主要針對任何人投資，無論產品及服務，都要有一個對等的回報。「講座從來無清楚講到底投資啲錢，係放喺服務或者係物品身上。」指即使是有肉類產品提取，以投資額數以萬元計，根本不是「對等」，「如果話係興建豬場仲慘，現時非洲豬瘟咁流行，如果疫情持續，要殺晒啲豬，投資咁高風險，到底有冇解釋過？」
除了涉干犯層壓式罪行外，陸偉雄亦指，每個投資項目都要得到證監會批准，方可在市面上公開集資，他推斷該計劃很大機會不能獲批，有非法集資之嫌。他續指，整個項目都在中國發生，「仲慘！如果日後公司清盤，或者有財政有問題，點先可以拎番啲錢，冇人知！」屆時可能涉違反欺詐罪。
「呢個鴻圖大計差唔多每個星期都有錢收，但只不過係美麗嘅謊言！」陸偉雄指推廣的內容含糊不清，「即使頭兩個月收到錢，都唔代表以後收到錢」。而公司成員曾向記者指「公司由中國軍方開，好放心」，陸偉雄反指「唔見得中國鼓勵軍人去從事民營業務，我又睇唔到軍人養豬，習近平會特別高興。」
學者：養豬指南一派胡言
陸偉雄坦言整個計劃，「太多漏洞，我覺得（欺騙）證據好強。」最後他稱：「用萬般藉口，用一啲好低層次嘅欺騙手法，我提議大家報警。」根據《禁止層壓式計劃條例》，一經循公訴定罪，可處罰款100萬元及監禁7年。
另外，《蘋果》就「27種中草藥養豬」、「弱鹼性豬」等向香港高等教育科技學院食品與健康科學學系副教授方麗影求證，她看過「優農良品」的指南後，直斥「一派胡言」：「根本冇可能work，簡直係亂嚟！廢噏！」