6月23日賽馬，第一場12時45分賽第一場，有14隻第五班馬出賽跑千二米，其中3號勇晉大師係新亞師弟張廣勇（前南華足球隊班主）嘅，因前賽跑千四有不錯表現，練馬師認為今次有得揮，蘋果評馬人積奇睇晨操素來有眼光，貼勇晉大師為全日精選，於是幾位新亞佬起哄，一齊落沙圈捧場，希望張廣勇可以拉頭馬影威水相。左丁山本來想買1、2、3、4、5號共五隻馬複式四重彩嘅，點知諗多咗，認為2號自由旺只贏過一千米，千二未必得，於是放棄，改買1、3、4、5、11；11號易勝相吸由潘頓騎，有資格跑入前四名啩？到了12時45分，馬入晒閘，忽接大記者急訊：「有貼士，買自由旺100蚊W。」抬頭望吓電算機，2號自由旺獨贏（W）賠率着綠燈，由25倍打到14倍，心中暗叫不妙。但已經開閘，買唔切，自由旺由利敬國策騎，一放絕塵跑第一，11號易勝相吸跑第14名包尾大幡，勇晉大師唔上唔落跑第十一，四匹四重彩馬就是2、1、5、4，十元派19萬元，左丁山幾乎眼前一黑。
激氣完畢，問大記者：「點解你識得要買自由旺？」大記者說：「余若薇入咗場，話有二百萬人上街，香港人爭取自由，氣勢旺盛，撞口卦叫買『自由旺』！」哎，冇得估，余若薇丈夫胡健維大國手係馬場常客，精研賽馬，相信對太太買中「自由旺」，亦要拜服。
呢日開場就落筆打三更，白白失去贏19萬元四重彩嘅機會，可見運氣不在我方，此日輸多贏少，若非越洋轉播日本馬寶塚紀念賽，聽日本馬專家肥仔K講貼士，買中「雍容日荷」及「神業」單Q，就真係輸到碌地。散場後，大記者又來短訊：「余若薇報喜，全日中四W，第一場自由旺，14倍，第四場轉數高，17倍，第八場跳出香港，3倍，第九場水火風20倍，收錢收到笑！係佢入馬場以來，贏最多錢一日！」吓，乜余若薇咁犀利，點刨馬㗎？大記者講：「佢話憑政治直覺分析喎，香港人爭取自由，夠旺，可以用連登號召到二百萬人上街，腦筋轉數高，跟住不少人怕修例搞移民，跳出香港。最後佢醒起現在青年人有句流行話，Be Water，所以買埋水火風！」左丁山為之目瞪口呆，余大狀嘅腦筋就真係轉數高嘞，咁都畀佢度到四隻獨贏，如果佢一早知，買四隻馬互串，單係一條四串一，一百蚊一注，可贏約一百五十多萬元。余大狀在七月一日如有政治靈感買馬，不妨及早通知大記者！