立法會首席諧星、民建聯元秋蔣麗芸噚日唔知係受近日抗爭氣氛影響，定因送中惡法一役俾特首林鄭月娥跣一鑊谷住道氣冇得發洩，竟然喺立會暴走，先喝罵自己嘅黨主席兼立法會代主席李慧琼「你唔好叫我個名」，之後又同同區嘅民主黨黃碧雲擦出火花，搞到元秋要向李慧琼詐型話：「主席，佢唆擺你去劈咗我個頭呀！」
話說葉建源喺休會辯論發言，提到修例一事上，見到中聯辦「一聲令下」建制派立即全部歸位。可能崩口人忌崩口碗，元秋聽到火到嚟埋，話《議規》唔畀議員猜度、想像其他議員，仲鬧葉建源「人哋（中聯辦）命令過你咩？你聽過咩？」
做代主席嘅李慧琼可能諗住勸交，於是叫一叫咗元秋個名，點知元秋嘅怒火瞬間升到極點，一手指住李慧琼話：「你唔好叫我個名！」李慧琼都被嚇窒，結果反而要由曾經爆粗鬧特首林鄭月娥嘅工聯會麥美娟拉元秋出去。過咗陣，元秋怒氣未消，喺葉建源講完嘢又起身話，葉建源建議調查係咪包埋有老師逼學生罷課先，又聲稱佢手上有學校、老師嘅名單。素來唔打爛仔交嘅葉建源不慍不火，回應話元秋講嘅唔係事實，根本冇老師逼學生遊行。無啦啦被元秋鬧埋嘅李慧琼，嗱嗱聲叫下一位發言嘅議員講嘢算。
黃碧雲還擊：劈佢個頭落地
之後新民黨主席葉劉淑儀發言老屈民主黨創黨主席李柱銘，黃碧雲發言替李澄清，元秋就發爛渣，用規程問題打斷碧雲。碧雲已經㷫㷫哋，於是向又做代主席嘅李慧琼投訴，「睇吓你嘅黨友發咩噏風啦！」 元秋於是又喺個位度嘈，呢個時候碧雲真係爆出嚟，向李慧琼話：「不如劈咗蔣麗芸個頭落地啦，成日阻住人哋發言」。元秋就谷住道氣，又向李話：「主席，佢唆擺你去劈咗我個頭，你聽唔聽到？點解唔告誡佢？」再次面對元秋呢位出色黨友嘅李慧琼，呢次索性暫停咗個會算數。
李八方