美國駐香港及澳門總領事館總領事就快換人，現任總領事唐偉康（Kurt Tong）做埋6月就走，由史墨客（Hanscom Smith）接替佢做總領事，7月起正式履新。唐偉康任內好鍾意落區「視察民情」，佢亦好鍾意香港、中國文化，又去過寺廟參觀，又去新界睇鄉郊景色，不過原來佢最喜愛係傳統手工藝，佢日前就喺fb發文，話自己一直都好欣賞傳統嘅手工藝，所以喺離開香港之前，特登走去搵師傅幫佢刻番個圖章，仲將佢個圖章相貼上fb。原來個圖章係佢中文名，好多網民留言，除咗多謝佢，仲希望美國政府繼續幫港人爭取民主。