范冰冰同李晨拍拖四年，曾經到談婚論嫁階段，即使冰冰喺上年捲入逃稅風波，李晨一直不離不棄，陪住冰冰共患難。可惜到冰冰近期積極為復出準備，佢哋噚晚突然喺微博宣佈分手，最終未能牽手走到白頭。
冰冰噚晚先喺微博貼出一段留言：「人的一生可能會經歷各種告別，在我們的相遇中收穫的愛和溫暖，都化為了永恒的力量，感謝一路走來你所有的給予，支持和愛，謝謝未來還會有的關心和愛護。我們不再是我們，我們依然是我們。」李晨喺冰冰留言後一陣，就喺微博轉發冰冰嘅說話，兼留言：「從朋友到愛人，再做回朋友，情感的形式會變，但你我之間最純粹的感受不會變，彼此的信任與支持是永恒的。我們不再是我們，我們依然是我們。」用好文藝嘅方式宣佈分手。
逃稅風波拖累婚事
冰冰同李晨喺2014年因為拍內地劇《武則天》相戀，2015年李晨喺微博公開同冰冰合照，再配文為「我們」公開戀情。兩年後，李晨趁冰冰36歲生日，豪花超過300萬港元，打造粉紅色花海派對，又訂製多個冰冰寵物貓造型蛋糕，向女友求婚。原本佢哋計劃喺上年舉行婚禮，但因為冰冰捲入逃稅風波，所有活動要取消，冰冰喺人前消失近四個月時間，同時婚期亦喺無奈之後一拖再拖，雖然最近不斷傳出佢哋嘅婚訊，但最終都喺分手收場。
撰文：馮仁昭