名媛邱李茂琪（Margaret）與家族經營鐘錶生意的丈夫邱子傑（Jeffery）今年結婚邁入22年，多年來男主外、女主內。愛發明的她，不時在家中設計新玩意，三年前又創立自己的珠寶品牌，醉心藝術。對於一對子女未來是否接手二人的生意，Margaret坦言非傳統思維：「行行出狀元，入咗大學之後，我哋任務已經完成，將來點樣闖就靠自己。」
撰文：羅慧敏
攝影：林德雄
名媛邱李茂琪與邱子傑結婚多來，一直由她照顧家人，老公就負責打理家族鐘錶生意。不過醉心藝術的Margaret，多年前重拾畫筆，作多種藝術創作，三年前更創立自己的珠寶品牌，又做家中的「發明家」。
Margaret是家人朋友群中的「發明家」，日前她接受《蘋果》訪問時笑說：「其實我細個已經好鍾意發明嘢，又鍾意整新嘢，佢哋都會叫我女博士。好似之前屋企發明咗張茶几麻雀枱，因為我有幾個朋友好鍾意打麻雀，但喺屋企有張麻雀枱又好唔靚，所以就諗咗呢個設計；又試過設計outdoor酒吧，大家都知我鍾意發明嘢。」
親友成白老鼠
跟李嘉欣及盧淑儀等份屬老友，Margaret笑言自己經常有瘋狂的想法，朋友與老公均成為白老鼠，她說：「唔一定係珠寶，有啲發明，佢哋都覺得幾好，好似去旅行時，篋入面嘅污糟衫同底衫褲飛到周圍都係，如果俾人查嘅時候會好核突，我就做咗一個四格、有上、下層有拉鏈嘅袋，佢哋到𠵱家都會帶住；修甲時怕俾LED燈照黑，我會做一啲開窿嘅手套，大家都覺得幾得意。」
Margaret和老公育有一對子女，大仔邱聖橋與孻女邱聖華（Jessie）均已到美國留學，對於家族生意的傳承，Margaret說：「冇所謂㗎！每個人嘅興趣都唔同，一定要出去闖吓嘅，就算佢哋要創業，都要自己去闖吓！出咗去30年後返嚟都得，我哋唔係好傳統，行行出狀元，如果真係諗到啱自己，又可以發揮到都得，入咗大學之後，我哋任務已經完成，將來點樣闖就靠自己。」
女兒不怕辛苦
大仔喜歡藝術、細女則喜歡服務性行業，Margaret指一對子女的喜好不一樣，目前她只希望仔女享受大學生活，不要只求分數，問到怕女兒辛苦嗎？她笑說：「佢好捱得㗎，佢可以企八粒鐘唔出聲，曬到飛起幫人攞嘢，乜都得。」邱氏一家四口人前人後也相當溫馨，提到如何保持如此關係？Margaret笑說：「其實我同Jeffery喺大學時期、啱啱係大仔呢個歲數認識，𠵱家大仔期待自己老婆出現。當年我哋好早識，亦係朋友中最快生小朋友，好多嘢都唔知點處理，所以𠵱家一家人有乜嘢事都會開家庭會議，民主得嚟唔好一個做衰人，係就一齊做。」
更多精采時尚內容，盡在 http://add.appledaily.com。