90後護士阿峰與太太以約740萬元買入啟德天寰兩房單位，接受訪問時客廳冷氣機竟滴出水柱，客廳牆角更驚現蜘蛛網及蜘蛛乙隻，資深驗樓師詹濟南徒弟陳智康「康仔」打開洗手盆櫃發霉生口木板，即場加演「變變變生命力之蜘蛛食卜泥」，一堆蟲蝨四圍走。最終驗樓48分，不合格。
去水喉淤塞 冷氣機滴水
阿峰與記者談了10多分鐘後，突然傳來滴滴答答聲，他已準備膠桶載水，「收樓當日，冷氣機開咗10分鐘，喺房聽到滴滴答答，原來冷氣機有條水柱滴落嚟，滴到地板，長流㗎喎，唔會停……冷氣機唔係好大問題，應該可以執修，最緊要唔係結構性問題。」
此外，他並不滿意洗手盆櫃，「打開好大陣噏味，見到有啲位發霉，應該單位擺咗一段時間都無人理過。牆角有蜘蛛網，臨交樓前都冇人執過，唔知點解最後冇清潔一次。」
隨後康仔入屋，直指：「冷氣機滴水，主要因為去水喉塞咗，啲水去唔切就滴返落嚟，而呢個單位位處極低層，有機會去水喉下面有少少石仔塞住。暫時見到屋苑有兩個單位冷氣機去水喉都出現咁嘅情況，不過呢個單位最嚴重。」另一個問題是洗手盆櫃，康仔徒手拎起發黑生口板，板底與邊滿佈霉菌與蟲蝨，相信是以霉菌為主食的卜泥四圍走，鏡頭聚焦細看，看到蜘蛛仔捕捉卜泥裹腹。
浴室假天花內熱水喉管包膠亦未做足。廚房鋅盆水龍頭滲水到櫃底，洗衣機去水喉亦漏水，而且房間玻璃窗崩裂要更換，工作平台又有多塊空心磚。全屋15項工種，4項捧蛋，包括來去水、鋪磚、冷氣機及整潔，總分48分，屬於不合格。康仔稱，已檢驗天寰十多個單位，評分普遍六、七十分，是次單位暫為新低。