現年48歲的梁佩瑚乃89年港姐季軍，她說人生走了很多冤枉路，事業上因自己心直口快易得罪人，試過有次趕時間出席公司飯局，被導演冷嘲：「快啲去接客。」她嬲到投訴對方。事業不順，情路亦曲折，她曾遇過愛情騙子，又糊塗做過「小三」，難怪2015年認識老公、地產商人郭雲飛時，即問對方：「你離咗婚未？」
撰文：余燕儀
攝影：沈健程
梁佩瑚的人生路很曲折，選港姐後入行做藝員，卻因不懂埋堆，最後惟有逃離娛樂圈，用六年時間考律師，最後走去寫愛情小說，感情路上雖遇過兩次騙子，幸好最終遇上命中注定的老公。
歷兩次重創
日前梁佩瑚在尖沙嘴接受《蘋果》專訪，她說選完港姐後做藝人，談及當年被寸「接客」的事，她亦自我反省：「之後個導演有同我講唔好意思，𠵱家諗番佢係唔好，但我係咪要咁嘮嘈呢？」在娛樂圈浮沉十多年後，她決定離開重返校園讀法律，但考到牌之後，又沒有做法律相關事務，反而轉寫小說，算是有成績，起碼上到十大暢銷榜。
寫過無數愛情故事的梁佩瑚，人生卻經歷兩次重創：「遇過感情騙子，試過被呃錢，又試過未離婚但話畀你知離婚，跟住俾人哋老婆不停咁鬧小三，做埋啲網絡欺凌嘅嘢，用詞好抵死『呢個做小三嘅人唔係好年輕，係老小三。』咁人哋冇錯嘅，你做緊壞事喎！」
知道做了第三者後，梁佩瑚即扯火責問當時的男友：「佢話分開咗冇一齊住，咁都係吖，你唔可以陷我於不義，我哋係經朋友介紹，介紹時候話佢同太太分開咗，佢就話我冇問清楚，好在只拍咗兩、三個月。」
又遇呃錢男
提起呃錢男友，梁佩瑚谷氣說：「都係自己大意，遇人不淑，佢仲要連朋友、阿妹都呃，呢個拍咗兩、三年，梗係傷，諗番往事一樁，人生嘛。」經一事長一智，當梁佩瑚遇到郭雲飛時，她第一件事就要搞清楚對方是否單身：「我第一時間問佢係咪離咗婚，佢即刻send晒離婚協議書畀我，睇到佢好有誠意。」她指老公對自己一見鍾情：「佢話第一次見到我就鍾意我，不停說服我同佢拍拖，咁嗰陣我都45歲，想搵個伴，咪試吓囉。」之後兩人拍拖八個月閃婚，婚後很幸福。
場地提供：Harlan's（The ONE）