「反送中」爭議喺政府拒談撤回下繼續發酵，特首林鄭月娥到今日仲唔聽民意，懶理民望仲衰過689，雖然北京仲好撐佢，但難免有人諗萬一娥特步老董後塵，一年半載之後應中央要求腳痛，咁邊個頂佢個位好？咁自然有人會想選過特首、民望又高嘅薯片叔叔曾俊華出山，不過曾俊華噚日好明確表示，對於再選特首立場係：「N！O！」
嘆衝突一起難回頭
曾俊華噚日同佢前政治助理羅永聰出席facebook香港總部直播室開幕，仲即席直播，討論到反送中爭議。薯片叔叔話今次衝突睇到一般香港人都好斯文，唔打交，又話最重要係避免衝突發生，因為衝突一發生就好可能會出現暴力，好難返轉頭，好難終止。
羅永聰就話警方係今次事件磨心，政府高層製造矛盾，解決唔到社會問題，但責任推到基層警員身上找數，非常不公道，曾俊華亦表同意，又話現在社會積累矛盾仍然存在，只係過去兩年收埋咗，現時情況同60、80年代美國年輕人同警察時有衝突情況相似，佢對此感擔心，因為暴力會帶來仇恨，而且係返唔到轉頭，要小心處理。