早排有網民將包括參與6.12鎮壓嘅警員起底，再將呢啲社交網站收集返嚟嘅公開資料整理放上網，咁班差人就一定唔高興，民建聯立法會議員葛珮帆好醒咁幫差人出頭，前日去私隱專員公署請願，叫私隱專員公署調查，而私隱專員黃繼兒又話已叫有關營運商，將相關圖文移除。葛珮帆梗係覺得做到嘢，應該好多差人會多謝佢，但事實可能未必係咁，葛博士今次行動可能有反效果，令班差人私隱遍地開花、甚至衝出國際。
網民︰鏟一po十 百倍奉還
話說有網民將葛珮帆嘅「成功爭取」貼上連登討論區，立即引起連登仔熱烈討論，除咗關心連登有冇刪相關嘅po，自然討論埋點回應葛珮帆嘅「成功爭取」喇！有連登仔即刻話「鏟一po十、百倍奉還」，有人更講明要po到遍地開花，又有話貼去外國討論區，仲有人提議po去外國成人網站，好似pornhub咁，睇私隱專員係咪咁把炮可以叫外國政府、網站幫手刪！
八方見到咁形勢，連登仔隨時講得出，做得到，如果差人嘅私隱真係俾人貼到全球不同網站，連鹹網都有，你叫香港警察情何以堪呢？到時佢哋應該多謝葛博士，定係嬲葛博士無端端又引起班連登仔搞事？
李八方