意甲過去八季都由祖雲達斯雄霸，適逢今季「老婦人」換上沙利執教，唔少人都認為祖記嘅霸主地位有多少不穩。事關先有國際米蘭搵嚟名帥干地執教，另外近幾季祖記嘅最大對手拿玻里，亦都有意喺皇家馬德里羅致失寵嘅占士洛迪古斯，而且仲出到高掛多年嘅馬勒當拿10號波衫嚟吸引對方。
過去拿玻里教頭安察洛堤喺皇馬同拜仁執教嘅時候，已經同呢位哥倫比亞中場合作過，亦對佢欣賞有加。據報拿玻里以占士為今個夏季轉會窗嘅頭號獵物，希望呢位未被拜仁慕尼黑買斷嘅皇馬棄將，願意為呢支意大利南部球會效力。拿玻里將出資5,000萬歐元（約4.4億港元）羅致，人工亦高達600萬歐元一年。此外，為咗得占士歡心，甚至願意將拿玻里代表人物馬勒當拿嘅10號波衫利誘對方。
馬勒當拿係拿玻里嘅傳奇人物，老馬喺1984至91年效力拿玻里期間，曾經喺87、90兩奪意甲冠軍，對於多年來由北部球隊把持嘅意甲，可謂破天荒創舉。因此老馬亦係拿玻里，以及意大利南部球迷嘅神，由老馬離隊後，拿玻里一直封印佢所着嘅10號球衣。
唔理老馬死忠反對
時至今日，歌頌馬勒當拿嘅橫額，仍然喺拿玻里嘅聖保羅主場高掛，可見老馬嘅地位之崇高。
由於27歲嘅占士洛迪古斯不論球會或者國家隊，一直都係身穿10號波衫，拿玻里為咗令到呢位球星願意離開頂級豪門來投，甚至寧願「犧牲」老馬嘅戰衣，就算死忠拿玻里球迷會大怒，亦在所不惜。誓要將佢捧成新一代拿玻里嘅旗幟人物，唔知到最後呢招利誘會唔會成功。
睇中羅馬文奴拿斯
不過，講到尾可以賺多啲就最實際。話說意大利即將有稅制改革，旅居意國嘅外籍球員稅率由47%大幅降低到23%，對球員嚟講，意甲球會嘅吸引力將會大增。
除咗占士之外，拿玻里亦都有意加強防線，所以有意買入羅馬中堅文奴拿斯。呢位希臘中堅去到6月30日就會有3,600萬歐元嘅賣斷條款。據指現時拿玻里有意用小將阿馬度迪亞華拉作籌碼，外加1,600萬歐元羅致。而呢單收購，拿玻里都要面對祖記嘅競爭。