【黑鏡線索】
之前寫過好幾篇關於remote work，其實遙唔遙距，只係表面，重點係，喺mobile internet嘅前提下，公司嘅組織形態，可以有點樣嘅進化？距離只不過係溝通模式嘅表象，而溝通模式則係組織形態嘅表象。
Internet出現咗幾廿年，點解到今時今日，好多公司，都仲係用緊好多年前嗰套模式？第一，可以用internet用到幾盡，的確唔同行業可以有好唔同嘅程度。第二，坐定定喺面前嘅電腦上到網，同隨身嘅電話24小時上到網，係好大嘅分別。
擺脫舊模式 要有人先行
第三，雖然iPhone都出咗十年，但就如被困喺籠裏面嘅動物，就算打開籠門都要等一排先走出嚟，科技嘅嘢，要擺脫既有模式而發揮得盡，由小撮人先行發展成主流，係要等一段時間，甚至係一代人嘅時間。
就好似，以前有同事質疑，remote work開發軟件行唔通，但問題係，同事都知，公司開發嘅軟件，明明底層係用咗好多open source軟件，而open source軟件嘅參與者，不但遙距，甚至素未謀面，互相未必知道真實身份。咁點解自己公司開發軟件，就要成村人坐埋一堆？
推多一步，mobile internet助長新嘅組織模式，唔止於公司層面，道理上，任何性質嘅組織，都可能受惠。例如，反送中運動，參與者嘅組織模式，明顯比起五年前雨傘嗰次，多咗嘗試，進化咗。五年前，有冇mobile internet？有，不過組織模式嘅探索，需要時間，似乎呢五年嘅時間，足夠一個版本嘅升級，去be water定be乜。
組織不單止喺街上，亦都包括網上。例如連登發動刊登各國報紙頭版，網上眾籌半日爆標，一兩日就令到世界各地多好多人留意件事，明顯同遊行籌款，或者單靠議員飛去邊到見外國政客，變化多咗。又例如係連登起底，當中嘅覆蓋、速度、互相走位，已經發展成熟得好交關，可以話將互聯網嘅搜尋功能，發揮到極致。好多人都識得上google搵嘢，但起底卻係完全另外一個層次，唔明嘅人，係好難想像當中嘅差異。
減少內耗成本 「碼列」唔難擋
所謂廢老廢中廢青代溝問題，本質上唔一定係年代問題，但的確，一個人成長於邊個年代，好影響佢嘅認知模式，而好多時，上代限用既有框架去睇新模式，比起下代唔理固有做法，後果更嚴重。累積嘅經驗，用得着幾多，係一個難題，新唔一定啱，但不斷摸索，肯定比起認定太陽底下無新事，效果更好。
呢個欄叫黑鏡線索，引用Black Mirror電視劇個名，個調定得比較灰，尤其係，極權政府嘅數碼列寧主義（可簡稱「碼列」）似乎無可阻擋，極權統治者似乎好識得科技發展去鞏固同擴大權力。但至少喺公民未全盤散沙化嘅社會，自發組織，其實亦有可能有助科技去進化，例如，本來主要着眼貨幣應用嘅區塊鏈技術，有一分支，開始將加密幣底層嘅政策決定投票機制，應用落冇大台組織嘅自我管治上，如果可以將自發組職嘅內耗成本，減至某個critical point，產生嘅影響，可以好巨大。
撰文：宋漢生