梁詠琪（GiGi）事隔近十年再度加盟唱片公司，製作全新專輯，全因自從嫁人相夫教女後，覺得兼顧唱片製作太吃力，加上廿四孝媽咪的她，有感四歲大的囡囡Sofia多愁善感，經常害怕長大後父母離世會孤獨，所以想預留多點時間陪女兒成長。
採訪：曹家誠
攝影：仇志德
現年43歲的梁詠琪日前在尖沙嘴接受訪問，透露與環球簽三年長約，因為她近年都是由自己的製作公司包辦音樂創作和發行，但自從有了家庭要兼顧的事情太多，令她分身乏術，為了平衡工作和家庭，所以才決定再簽唱片公司，她說：「現階段嘅我時間真係唔夠用，真真正正可做嘢嘅時間係夜晚10點後，要等囡囡瞓咗先，既然係咁不如畀人做，自己專心做幕前，可多番啲時間，始終有專業團隊幫手好啲。」
演唱會衝擊大
成為人母，GiGi坦言連選擇工作都多了一份考慮：「做忠做奸都唔緊要，但故事意識一定要正確，亦盡量都唔會拍親熱戲。」同時她覺得這樣做是給囡囡一個榜樣，又會向女兒解釋拍戲演角色是媽媽的工作，因Sofia漸漸長大，開始對事物好奇和發問：「佢好細個時，睇過我做演唱會，媽咪上舞台對佢印象好深刻，所以𠵱家我扮靚啲化妝出街佢就話：『媽咪係咪去開concert？』我話：『唔係成日都開，好辛苦㗎。』我諗對佢impact好大，影響佢好鍾意唱歌、表演慾強、鍾意學新歌同跳舞。」
談到造人計劃，GiGi搞笑說：「呢樣嘢隨時夜晚都可以，見到面都可以，但冇特別計劃，一切順其自然，阿女都講過想要個弟弟妹妹。」但GiGi直言現時以湊女為先：「因為Sofia開始搵學校，明年升K2開始去學校面試，我要多留時間喺香港。」
害怕失去父母
其實，GiGi希望騰出更多時間陪囡囡Sofia成長，皆因有感女兒早熟兼多愁善感，她說：「有次去旅行，瞓覺前佢突然喊住咁問：『係咪我大個咗就見唔到爸爸媽媽？』因為佢知道我哋會死，我話唔會㗎，我哋仲會一齊好耐，唔好咁諗。」但仍在飲泣的Sofia未能釋懷，繼續問：「係咪長大咗就唔會見到爸爸媽媽？」未待GiGi回答，Sofia又突然180度轉變說：「不過咁，我知將來會有個husband，咁我就唔會lonely。」說完隨即倒頭大睡，GiGi說：「結果嗰晚我同老公就瞓唔着，覺得佢思想好成熟，可以早啲同佢傾吓人生。」
場地提供：House 1881
化妝：Dephine Chan
髮型：Pius of Orient4 & Lupus of Orient4