6月16日，香港有成200萬+1人上街反對送中惡法，多個親北京嘅「愛字頭」組織即刻有行動，上周六晚喺中環遮打花園舉行「支持香港警察，祝福香港晚會」，最高峯時都有300人參加㗎，即係反送中遊行人數嘅0.015％咁大把。發起晚會嘅李偲嫣，當晚喺台上除咗狂鬧民主派同示威者，更騎呢地播放樂隊LMF批判社會嘅粗口名曲《冚家拎》，令台下唔少藍絲聽到時都打個突，有家長更即時離場以示不滿㖭呀。
歡迎反送中團體使用
正所謂躺着也中槍，慘被李偲嫣等一眾藍絲擺上枱嘅LMF，噚日喺facebook發表嚴正聲明，話對於近日有支持送中惡法嘅團體，喺聚會上播放LMF嘅作品感到「極度不安」，要求有關團體立即停止使用LMF嘅任何作品，仲抵死講明「支持撤回逃犯條例的團體除外！」套用689口頭禪，LMF明顯同李偲嫣呢班藍絲「恥與為伍」，要劃清界線。八方覺得，李偲嫣想播放含有粗口嘅聲帶，其實可以播返前年萬名警員喺警察集會齊嗌「×你老母」吖，起碼同聲同氣，唔會俾人發嚴正聲明投訴吖嘛！
李八方