楊明噚日喺將軍澳出席活動，提到過氣港男梁裕恆（Flow）早前喺fb上載咗幾張WhatsApp群組對話截圖，有個簡稱「M.Y」嘅人，睇到有示威者挖磚頭嘅影片後回應：「佢XX成班癲X咗」，楊明話：「嗰單嘢其實都有好多記者朋友問過我，我都冇乜點樣回應，好多斷章取義嘅嘢我又唔想回應，但係佢又好似夾硬砌咗啲立場畀我。」
支持和平反暴力
楊明又話：「我想重申一點，我係冇話過啲和平嘅示威者，好多正常嘅人睇到佢嘅截圖，都知道我係鬧緊一啲嗰條片上面嗰啲挖磚出嚟、兇啲記者、圍啲記者、鬧啲記者嗰啲人啦，我其實唔需要其他人去畀立場我嘅，我嘅立場好簡單好清晰，就係和平同反暴力，就好可惜啦，我哋喺個group度講嘅嘢，就有人攞咗嚟斷章取義啦，我唔知佢係有啲乜用意啦，咁大家喺個group度都算係朋友嚟嘅，大家so far都辛苦咗一套劇，三個幾、四個月嘅時間都係一齊辛苦嘅，我唔知道佢係有啲乜目的所以咁做，但係都唔緊要啦，其實好多觀眾都係好雪亮嘅，有啲讀者都好雪亮嘅，係有啲人會俾佢誤導咗啦！」
有報道話楊明同女友莊思明喺山頂獨立屋半同居，似乎好事近，問到佢哋有冇諗閃婚呢？楊明就話：「唔會閃囉，會講畀大家聽嘅，實質嘅時間大家都冇諗嘅，只不過會開始去plan嘅時候會同大家講，大家都會知，唔會秘密去搞。」
撰文：馮仁昭
