呢排主流聯賽收晒檔，但就有唔少元老出嚟過吓腳癮，好似皇家馬德里傳奇隊周日就同車路士傳奇隊喺巴拿比奴踢番場衞生波，兩隊星光熠熠就梗係合演入球騷，最後皇馬靠魯爾同摩連迪斯都梅開二度，以5:4力挫車仔傳奇。
呢場由皇家馬德里基金會主辦嘅慈善賽吸引咗大概60,000球迷入場，皇馬傳奇喺11分鐘由魯爾先開紀錄，摩連迪斯之後喺14同20分鐘連入兩球，將比數改寫成3:0後，車仔傳奇先由舒夫真高射入12碼追番球。普耶幫車仔追到2:3後，卡林保就幫皇馬射成4:2，完半場前車仔由加拿斯建功，半場皇馬領先4:3。換邊後，魯爾喺50分鐘再入一球，皇馬傳奇拉開至5:3，不過馬隆達喺66分鐘成功破網，車仔再追一球，最後皇馬傳奇就喺呢場慈善賽以5:4險勝車仔傳奇。
