建制陣營喺反送中輿論戰真係輸畀班連登仔九條街，但八方估唔到建制為咗抗衡網民，竟然疑似出埋插贓嫁禍呢啲「揦鮓招」，整條片去抹黑抗爭年輕人，仲有網民懷疑同撐送中導演李力持有關㖭。
話說最近喺一眾藍絲網媒以及建制派議員之間，瘋傳一條名為「致年青人：你哋冇上街嘅父母根本冇愛過你」嘅影片，片中自稱90後少年着黃衫，特登喺添馬公園以政總做背景錄影，聲稱自己6月9日同16日都有遊行反送中，繼而質疑點解現場大部份都係年輕人，啲父母去晒邊？最後想帶出嘅訊息就係唔使孝順父母！
唔少人睇完短片都覺得事有蹊蹺，特別係條片獲《文匯報》大肆報道，更加覺得似有人想插贓嫁禍年輕人。「求驗傳媒」facebook專頁就解構呢段疑似「鬼」片，發現po片者係一個自稱叫Louis Yuen嘅人，但佢個fb 6月15日先成立，短片則喺6月21日凌晨發佈，佢冇喺fb提過任何個人資料，亦冇證據證明參與遊行，質疑「一個這樣小規模的專頁所發佈的片段，竟然能爆發到近乎所有建制平台都熱播，實在厲害」。
主角係董之英舊生
更令人加強懷疑與建制有關嘅係，有人發現一直撐送中嘅李力持喺facebook出咗個po叫藍絲加強火力拍片反擊，隨即有人喺留言貼咗呢條片，仲以簡體字留言「下咗火先力哥，其實我哋呢條好成功了，不是一事無成」，咁同承認條片係建制搞出嚟有乜分別？
有網民仲成功起底，指Louis Yuen疑為仁濟醫院董之英紀念中學黃姓學生，《蘋果》向董之英查詢，校方回覆話呢個學生畢業多年，唔評論佢個人行為。又有網民發現身兼董之英校董嘅李力持曾經去過該校培訓演員多年，仲拍咗幾套中學電影，質疑條片根本係李力持拍，李力持以短訊回應《蘋果》話，「佢話就係？你唔去查吓？我收到風知道係黃痴瘋條哭佳策劃拍嘅！」
李八方
