向來好受外國傳媒歡迎嘅香港眾志秘書長黃之鋒，前晚竟然喺facebook出post炮轟「外國勢力可恥」、「英帝亡我之心不死」，仲話「不許洋人說三道四」，唔通佢都係傳聞中嘅「鬼」，關鍵時候現形？
原來係英國多間傳媒報道香港6.12有警察鎮壓抗爭者，兩名英籍現場指揮官成為眾矢之的，引起英國網民議論紛紛；黃之鋒就喺fb以「英籍黑警返到家鄉點見鄉親父老呢？」為題出po，話日前接受英國《泰晤士報》訪問（圖），向記者提到兩位鎮壓抗爭者嘅指揮官總警司陶輝（Rupert Dover） 同埋高級警司莊定賢（David Jordan）都係英國人。
之鋒話呀，呢兩位指揮官嚟自有民主自由嘅英國，但嚟到香港竟然鎮壓爭取民主自由嘅港人，兩人喺英國嘅親戚朋友翻開《泰晤士報》一定見到有關報道，「如今揚威祖家，你哋都有今日啦！」