利物浦有唔少經典逆轉比賽，05年歐聯決賽半場落後AC米蘭3球，下半場連追3球逼和3:3，到互射12碼贏埋；但似乎都唔夠周日FC江原主場對浦項制鐵場韓職神奇。 江原賽前連續四場不勝，浦項狀態就更頹賽前三連敗，主隊被睇高一線都正常。場波前半段浦項佔優，喺上半場領先2:0，易邊後再入兩球，56分鐘已經領先4:0，睇怕江原都返魂乏術。到70分鐘主隊終於由趙宰桓破蛋，加上78分鐘由外援施亞利斯再入一球，之後踢到90分鐘一直維持比數，眼見浦項穩袋三分之際，江源竟然喺補時嚟料，趙宰桓連入兩球完成「帽子戲法」兼扳平4:4，執返分都未夠，前鋒鄭祖國喺96分鐘接應傳中頂入神奇反勝5:4（圖），不過睇真啲對手門將喺撲波嗰陣，成個人已經喺白界入面。