周日女子世盃，喀麥隆0:3輸俾英格蘭嘅16強賽事，中國球證秦亮兩度喺VAR幫拖下作出不利喀麥隆嘅判決，班喀麥隆球員除咗強烈抗議，仲曾經拒絕開波搞到比賽停咗陣。
呢場波，喀麥隆球員曾畀電視鏡頭捕捉到吐口水同推球證嘅畫面，英格蘭主帥菲臘尼維利賽後就梗係鬧爆喀麥隆啦，話佢哋應該要感到羞恥。今場真係充滿火藥味，喀麥隆球員盧高開賽四分鐘，就因為對英格蘭嘅芭莉絲開踭攞黃牌，喀女嘅伊珍古仲被拍到約喺13分鐘嗰陣向東妮杜根吐口水，東妮杜根梗係火啦，不過球證都冇表示。半場補時球證又翻睇VAR，喺判定英格蘭第二個入球有效後，喀麥隆班球員就好不滿，曾拒絕開波搞到場波要暫停。
另外，喀麥隆下半場嘅入球經VAR判定越位無效後，珍妮恩高之後又被影到從後推球證、安高露就喺在比賽末段踩英格蘭侯頓隻腳，結果球證翻睇VAR後都係派黃牌咋。英格蘭今場順利淘汰喀麥隆後，周四就會喺八強對挪威，一於睇吓到時VAR會唔會又做主角先。