大AL以豆沙喉聞名，但原來是因年輕時模仿別人唱法，結果由扮變成真沙聲，他說︰「我出道時，騷靈音樂興起，黑人唱法好多係沙聲，我哋聽唱片模仿，嗰陣你越扮得似就越勁。後來唱酒吧，晚晚嗌三個鐘，長期嗌又冇保養，就變咗真沙。」大AL當年最愛唱英文歌，但因為許冠傑的廣東歌大行其道，唱片公司就想食住條水，於是大AL毅然改唱市井歌︰「我唔係靚仔，把聲又沙，公司覺得我好啱唱啲貼地歌《的士生涯》、《追龍》等，好貼地，之後出咗《我的歌》，嗰陣想轉型，提升番歌曲內涵，但正當個勢上緊，聲帶就出事。」
80年代，大AL唱到喉嚨生繭，他被迫退出樂壇，轉行做的士高睇場，大AL指生繭是歌手普遍的職業病︰「嗰時休息唔夠仲要唱，聲帶太攰喇，唱完落台又唔識保聲，嗰時好儍，講嘢好坦白，又俾報紙賣咗出嚟，失咗聲，對一個歌手嚟講就係玩完。」他說手術後聲線跟以前有分別，但退出樂壇及事業下坡，生繭只是部份原因，他說：「主要是厭倦，唱到冇晒靈魂。」